Teńgege qatysty rýbldiń nyǵaıýy Qazaqstan úshin mańyzdy faktorǵa aınalyp keledi - Súleımenov

ASTANA. KAZINFORM – Ulttyq qordyń resýrstaryn jınaqtap, barynsha tıimdi paıdalanǵan jón. Bul týraly Ulttyq bank tóraǵasy Tımýr Súleımenov aıtty.

- Syrtqy ınflıatsııalyq jaǵdaı qolaısyz qalyptasyp otyr. Oǵan sebep – Reseıdegi joǵary ınflıatsııa jáne álemdik azyq-túlik naryqtaryndaǵy baǵanyń ósýi. FAO derekteri boıynsha sáýir aıynda azyq-túlik baǵasynyń ındeksi 128,3 tarmaqqa deıin kóterilip, jyl basynan ócý úrdisin jalǵastyryp jatyr. Damyǵan elderde ınflıatsııalyq qysym tómendep keledi. Eýroodaqta ınflıatsııa 2,4 paıyzǵa deıin, AQSh-ta 2,3 paıyzǵa deıin baıaýlady. Saýdada qalyptasqan shıeleniske qaramastan, Eýropa Ortalyq banki dezınflıatsııalyq faktorlar basym bolǵanymen, ınflıatsııalyq targetke qol jetkizý múmkindigine senimdi ekenin bildirdi. Sonymen qatar AQSh-tyń Federaldyq rezerv júıesi (FRJ) saqtyq tanytyp, kútý ustanymyn saqtap qaldy. Inflıatsııalyq táýekelderdiń saqtalýy men AQSh-tyń ekonomıkalyq turǵyda damý jolyn jáne saýda saıasaty baǵytyna qatysty belgisizdikti eskere otyryp, mólsherleme ózgerissiz qaldyryldy, - dedi Tımýr Súleımenov.

UB basshysynyń aıtýynsha, Reseıdegi ınflıatsııa 10,2 paıyzǵa deıin baıaýlaǵanmen, nysanaly deńgeıden edáýir asyp tústi. Reseı banki qatań saıasatty jalǵastyryp, negizgi mólsherlemeni 21 paıyz deńgeıinde ustap tur. 2026 jyldyń sońyna taman maqsatty baǵdarǵa jetý úshin bıyl negizgi mólsherlemeni 19,5–21,5 paıyz aralyǵynda saqtaýdy kózdeıdi.

- Bul jaǵdaıda teńgege qatysty rýbldiń nyǵaıýy Qazaqstan úshin mańyzdy faktorǵa aınalyp keledi. Bir jaǵynan, bul otandyq óndirýshiler, ásirese, óńdeý ónerkásibi úshin baǵalyq artyqshylyq týǵyzady, ekinshi jaǵynan – Reseıden keletin ımporttyń edáýir kólemine baılanysty ınflıatsııalyq úderisterge áser etedi. Munaı naryǵyndaǵy jaǵdaı da turaqsyz, - dedi ol.

Onyń sózine qaraǵanda, Qytaı tarapynan suranys tómendegen soń OPEK+ elderinen túsetin usynystyń ulǵaıýyn kútýden jáne jahandyq saýda shıelenisiniń kúsheıýinen baǵaǵa qysym bar.

- Qazirgi jaǵdaıdy eskersek, boljamnyń bazalyq stsenarııinde Brent markaly munaıdyń ortasha baǵasy aldyńǵy raýndtaǵy 1 barrel úshin 73 dollarǵa qarsy 65 dollar deńgeıinde belgilendi. Saýda eskalatsııasy jáne munaı baǵasynyń kúrt tómendeýi shıkizat naryǵyna qurylymdyq jaǵynan táýeldi ekenimizdi kórsetti. Mundaı jaǵdaıda Ulttyq qordyń resýrstaryn jınaqtap, barynsha tıimdi paıdalanǵan jón, - dedi ol.

Buǵan deıin Tımýr Súleımenov krıptovalıýtaǵa ınvestıtsııa salýǵa qatysty pikir bildirgen edi.