Teńgede ál-Farabıden bastap Nazarbaevqa deıingi tarıx jatyr - Ǵarıfolla Esim
ASTANA. QazAqparat - Búgin Prezıdent Nursultan Nazarbaev beınelengen jańa banknotty tanystyrý rásiminde fılosofııa ǵylymdarynyń doktory, akademık Ǵarıfolla Esim alǵashqy bir teńgelik kýpıýrany jańa on myń teńgelik banknotpen salystyrdy, dep xabarlaıdy QazAqparat tilshisi.
«Bir teńgelik banknotqa ál-Farabı beınelengen edi. Mine, sol oqıǵaǵa da 20 jyldan asty. Búgin bizge Danııar myrza (Ulttyq bank tóraǵasy - avt.) on myń teńgelik banknotqa Elbasy beınelengenin aıtyp otyr. Demek, teńgede ál-Farabıden Nursultan Nazarbaevqa deıingi búgingi tarıx jatyr. Barsha qazaqstandyqtardy quttyqtaımyn! Tól teńgemizdiń tórge ozǵan kúni qutty bolsyn, aǵaıyn! Eńbegimizdi teńgemen alyp, es jınadyq, turmysymyzdy jóndedik, jóndep kele jatyrmyz. Uıqymyz tynysh, janymyz qınalmaıdy, qorqynysh-úreı sezimderi týyndamaıdy. Óz aqshamyz bar. Ony shyǵaratyn fabrıkamyz da bar. Aqsha bitip qalsa, shyǵara beremiz. Teńgemiz turaqty bolsa, turmysymyz turaqty. Buny Danııar myrzanyń ujymyna aıtyp otyrmyn. Teńgemiz teńsele bermeı, tuǵyrly bolsyn!», - deıdi Ǵ.Esim.
Aıta keteıik, shara aıasynda ǵalymdar men qoǵam qaıratkerleri jańa banknotqa qatysty óz oılaryn bildirdi. QR Ulttyq ǵylym akademııasynyń prezıdenti Murat Jurynovtyń oıynsha, jańa banknot teńgeniń qundylyǵyn arttyra túsedi.
Al Qazaqstan xalqy Assambleıasy tóraǵasynyń orynbasary Eraly Toǵjanovtyń Memleket basshysy Nursultan Nazarbaev beınelengen kýpıýra dollar sııaqty álemdik valıýtalarmen qatar tura alady dep sanaıdy.
QR Parlamenti Senaty tóraǵasynyń orynbasary Bektas Beknazarov ta Táýelsizdiktiń alǵashqy jyldary ulttyq valıýtamyzdy engizý jumysynyń basy-qasynda bolǵan Nursultan Nazarbaev jańa mereıtoılyq banknotta beınelenýge ábden laıyq deıdi.
Ulttyq bank tóraǵasy Danııar Aqyshevtiń sózine qaraǵanda, jańa kýpıýra Tuńǵysh Prezıdent kúni - jeltoqsannyń 1-ne qaraı shekteýli taralymmen bastyrylady.
Ol aqshanyń naqty taralymy jaıynda qolma-qol aqsha basqarmasynyń bastyǵy Toǵjan Ábisheva aıtyp berdi.
