Teńgebaev: Keden isi - ata kásibimizdiń biri

ASTANA. QazAqparat - Búgin Qazaqstannyń keden organdarynyń qurylǵanyna 25 jyl tolýyna oraı saltanatty jıyn ótti. Bul týraly QazAqparat QR Qarjy mınıstrliginiń Memlekettik kirister komıtetine silteme jasap habarlaıdy.

Saltanatty jıyndy ashqan QR Qarjy vıtse-mınıstri Ardaq Teńgebaev Qazaqstan aýmaǵyndaǵy keden qyzmetiniń tarıhy tereńde  ejelgi túrkiler zamanynda jatqandyǵyn atap ótti. Keden isiniń qalyptasýy Uly Jibek joly baǵdarynda saýdanyń damýymen tyǵyz baılanysty ekendigin eske saldy.

«Sondyqtan da, keden isin ata kásibimizdiń biri dep aıta alamyz!», - dedi qarjy vıtse-mınıstri.

Saltanatty jıynǵa keden organdarynyń burynǵy basshylary Ǵanı Qasymov, Maratqalı Núkenov, Qozy-Kórpesh Karbýzov qatysty. Al Aqtóbe oblysynyń ákimi Berdibek Saparbaev óziniń burynǵy áriptesterin beınejoldaý arqyly quttyqtady.

 

QR QM Memlekettik kirister komıteti tóraǵasynyń orynbasary Gosman Amrın Qazaqstannyń 25 jyl táýelsizdiginde kedenniń qol jetkizgen tabystary týraly aıtyp berdi. «Qazaqstan Respýblıkasynyń keden qyzmeti óziniń 25 jyldyq jumysy barysynda aıtarlyqtaı jetistikterge jetip, keńestik odaqtan keıingi aýmaqta mańyzdy ról atqarady», - dedi ol.