Teńge turaqty, ınflıatsııa dálizi de ornyqty - Q. Kelimbetov
ASTANA. 23 qazan. QazAqparat - Elimizdiń ulttyq valıýta naryǵyndaǵy jaǵdaı qalypty. Inflıatsııa dálizi de ornyqty. Búgin Parlament Májilisiniń jalpy otyrysynda «2014-2016 jyldarǵa arnalǵan respýblıkalyq bıýdjet týraly» zań jobasyna baılanysty baıandaǵan QR Ulttyq banki tóraǵasy Qaırat Kelimbetov osylaı málimdedi.
UB tóraǵasynyń aıtýynsha, ulttyq valıýta naryǵynda qalypty jaǵdaıdyń saqtalýyna teńgeniń aıyrbas baǵamynyń uzaq merzimdi trendterin anyqtaıtyn negizgi faktorlardyń ózgermeýi sep bolyp otyr. Sondyqtan da, Ulttyq bank teńgeniń aıyrbas baǵamynyń kúrt ózgerýine jol bermeý baǵytyndaǵy saıasatty ustanatyn bolady. «Teńgeniń aıyrbas baǵamy trendi jalpy makroekonomıkalyq alǵysharttar áseri esebinen qurylady. 2013 jyldyń 9 aıy ishinde teńgeniń aıyrbas baǵamy AQSh dollaryna qatysty alǵanda 2 paıyzǵa tómendegen. 21 qazandaǵy qalyptasqan jaǵdaıǵa sáıkes jyl basynan bergi atalmysh kórsetkishtiń tómendeý deńgeıi de 2 paıyz», - dedi Q. Kelimbetov.
Budan bólek, Ulttyq bank tóraǵasy elimizde ınflıatsııa 6-8 paıyz dálizinde saqtalatynyn da málim etti. «Úkimetpen birlesip birqatar ınflıatsııaǵa qarsy sharalar keshenin iske asyra otyryp, Ulttyq bank ınflıatsııany 6-8 paıyz dálizinde saqtap qalýǵa áreket jasaýda. 2014 jyly ınflıatsııalyq úderisterdi birtindep baıaýlatý sharalary jalǵasyn tabady. 2013 jylǵy qyrkúıektiń sońynda jyldyq ınflıatsııa 5,4 paıyzdy qurady», - dedi Qaırat Kelimbetov.
