«Teńge tegeýrinin endi kórsetedi» - respýblıkalyq basylymdarǵa sholý
***
«Aıqyn» basylymy búgingi sanynda «Teńge tegeýrinin endi kórsetedi» degen taqyryppen maqala jarııalap, onda «Kedendik odaq aıasynda «ortaq valıýtaly aımaq» qurylatyn bolsa, ıntegratsııalyq úderis qalaı órbıdi jáne ulttyq teńgeniń jaıy ne bolady?» degen saýaldarǵa jaýap izdep kórgen. «Eger ortaq valıýta ómirge kele qalsa, ol eshbir memlekettiń quzyryna baǵynbaıtyn jáne barshaǵa birdeı qyzmet etetin eýro nusqasynyń bizdiń aımaq jaǵdaıyndaǵy bir kórinisi bolary anyq. Al budan utpasaq, utylmaımyz», - deı kele, «ortaq valıýta táýelsizdikke nuqsan keltiredi» dep qobaljýǵa eshbir negiz joq ekendigine jete toqtalady. «Qazaqstan táýelsizdiginen aıyrylmaq túgil, odaqtaǵy eń jetekshi memleket bolýy ábden múmkin. Óıtkeni bizdiń qazirgi jáne bolashaqtaǵy ekonoıkalyq jaǵdaımyz Reseıge «kóz súzbeıtindeı» ómir súrýimizdi qamtamasyz ete alady», - delingen maqalada.
Sonymen qatar «Aıqyn» gazetinde jarııalanǵan «Aýyzsý altynnan da qymbat qundylyqqa aınalady» degen maqalada Qazaq eli men «Aspanasty eli» arasynda ortaq sý kózderin bólisýdiń osyǵan deıin bolǵan barlyq derlik túıinderi endi úsh jyldan keıin tarqaýy yqtımal ekendigi aıtylady. Onda habarlanǵanyndaı, keshe Astanada jumysyn bastaǵan Islam yntymaqtastyq uıymynyń keńesshilik tobynyń jıynynda Qazaqstan men Qytaıdyń transshekaralyq ózender sýyn bólý boıynsha kelisimdi 2014 jyly bekitýi múmkindigi jarııalanǵan. «Aıtpaqshy, osy otyrysta taǵy bir jańalyq málim boldy: jaqynda ǵana qazaq jerinde óz ataýyn aýystyrǵan osynaý jahandyq musylman uıymyna Qazaqstannyń tóraǵalyǵy barysynda álemdegi barlyq Islam elderiniń ortaq Sý strategııasy qabyldanady dep kútilýde», - dep jazylǵan materıalda.
***
Al «Alash aınasy» gazetinde basylǵan «Atyraýda aýa joq» atty maqalada qalanyń ekologııalyq ahýaly tym múshkil ekendigine alańdaýshylyq bildirilgen. Gazettiń jınaǵan derekterine sáıkes, Atyraý aýasynan kómirsýtek pen merkaptannyń shamadan tys mólsheri bar kórinedi. «Nátıjesinde munaıly qalada naftalın, fenantren, antratsen syndy hosh ıisti kómirsýtekterdiń kóbeıip ketkeni anyqtaldy. Atyraýlyqtar tynystap júrgen aýanyń quramynda kúkirtsýtek pen azot oksıdi birneshe esege kóp», - dep jazady basylym.
Sońǵy kezderi eldiń medıtsına salasyna óte kóp syn aıtylyp júr. «Alash aınasy» gazetiniń búgingi sanynda densaýlyq saqtaý salasynyń jedel járdem kórsetý qyzmetine qatysty synı maqalasy jarııalanyp otyr. «Eki aıaǵyńdy teń basyp, dárigerdiń aldyna óziń bara alatyndaı jaǵdaıda sóz basqa, al qarǵa adym jer muń bolyp, ómir men ólim arasynda jatqanda jedel járdem qyzmetiniń aýadaı qajettigi sózsiz. Sondyqtan basqa basqa, naýqasty ólimnen arashalap qalatyn, alǵashqy medıtsınalyq qyzmet kórsetetin jedel járdem qyzmeti neǵurlym jyldam bolyp, talapqa saı, barlyq ýaqytta óz qyzmetine saqadaı saı turýy qajet-aq. Áıtse de halyqty saýyqtyrmaq túgil, ózi «dimkás» medıtsına salasynyń jedel járdem qyzmetine aıtylar syn azaımaı tur», - delingen «Jedel járdemge járdem qajet» degen taqyryppen jaryq kórgen maqalada.
***
«Rekonstrýktsııadan ótken Aqbaqaı altyn óndirý fabrıkasy jylyna 2,8 tonna quıma altyn beretin bolady», - dep habarlaıdy «Kazahstanskaıa pravda» gazeti «Dragotsennyı podarok strane» atty maqalada. Ótken jyldyń qyrkúıek aıynda Jambyl oblysyna is-saparmen barǵan Prezıdent N. Nazarbaev «Altynalmas» AQ basshylyǵynyń fabrıkany qaıta jańartýdan ótkizý jónindegi usynysyn qoldaǵan bolatyn. 9 aı ótken soń Memeleket basshysy jalpy ulttyq telekópir kezinde ÚIIDB aıasynda jańadan túlegen óndiristi qaıta iske qosty. Bul Aqbaqaı taý-ken baıytý kombınaty men búkil eldiń altyn óndirý salasy úshin ǵana emes, sonymen qatar tarazdan 600 shaqyrym tusta Betpaqdalanyń shóldi jerdi ornalasqan Aqbaqaı aýylynyń 1 350 turǵyny úshin de jańa kezeńniń bastalýyn bildiredi.
