Teńge nelikten nyǵaıyp keledi – Ulttyq bank basshysynyń jaýaby

ALMATY. KAZINFORM – Qazaqstan Ulttyq bankiniń tóraǵasy Tımýr Súleımenov teńge baǵamy qalaı qalyptasatynyn túsindirdi.

Almatyda ótken Qazaqstan qarjygerleriniń XIII kongresinde Tımýr Súleımenov jýrnalısterdiń valıýta baǵamy jáne altyn jaıly qoıylǵan suraqtaryna jaýap berdi.

— Biz valıýta baǵamyna arnaıy retteý júrgizbeımiz. Bizde baǵam suranys pen usynysqa baılanysty qalyptasady: naryqtaǵy dollarǵa usynys pen suranys áser etedi. Qazir bul faktorlar teńgeniń nyǵaıýyna yqpal etip otyr. Oǵan munaı baǵasynyń salystyrmaly túrde jaqsy bolýynan valıýtanyń túsýi, aktıvterdi konvertatsııalaý operatsııalary, Ulttyq qordan túsetin transfertter áser etedi. Qazirgi jaǵdaı osylaı qalyptasyp otyr, — dedi Tımýr Súleımenov.

Sondaı-aq ol Ulttyq bank altyn satyp alýǵa basym quqyqty saqtap qalatynyn atap ótti.

- Altyn — bul qorǵanysh aktıvi. Ol S&P, Nasdaq, bıtkoın jáne basqalarǵa qaraǵanda jaqsy nátıjeler kórsetti. Sondyqtan ázirge altyn alýǵa basym quqyqtan jaqyn arada bas tartýdy josparlap otyrǵan joqpyz. Memleket úshin rezervter jınaıtyn bolamyz. Keıin, jaǵdaı turaqtanǵanda, ári qaraı kóremiz, — dedi ol.

Eske salaıyq, buǵan deıin Ulttyq banktiń ınflıatsııa boıynsha boljamy qandaı ekenin jazǵanbyz.