Teńge mártebesi konstıtýtsııalyq turǵyda bekitiledi — Konstıtýtsııalyq komıssııa

ASTANA. KAZINFORM — Teńge mártebesi konstıtýtsııalyq turǵyda bekitiledi. Bul týraly Konstıtýtsııalyq reformalar jónindegi komıssııanyń 9-otyrysynda Konstıtýtsııalyq sot tóraǵasynyń orynbasary Baqyt Nurmuhanov aıtty. 

— Ótken otyrysta áriptesterimiz birneshe usynys engizdi. Olar óte mańyzdy jáne kóptegen elde konstıtýtsııalyq quqyqtyq retteýdiń nysanasyna jatady. Osyǵan baılanysty jobada atalǵan jańalyqtardy bekitetin normalar qosymsha qarastyrylyp otyr. Mysaly, teńgeni ulttyq valıýta retinde konstıtýtsııalyq turǵyda bekitý týraly usynysty iske asyrý maqsatynda 2-bap 6-tarmaqpen tolyqtyryldy. Atalǵan tarmaqqa sáıkes, «Qazaqstan Respýblıkasynyń ulttyq valıýtasy, aqsha birligi — teńge. Teńgeni emıssııalaýdyń aıyryqsha quqyǵy Qazaqstan Respýblıkasyna tıesili, — dedi ol.

Onyń aıtýynsha, 2-baptyń 6-tarmaǵy 7-tarmaq bolyp ózgertildi. Onyń joba boıynsha mazmuny saqtaldy, ıaǵnı Qazaqstan Respýblıkasynyń egemendigi, táýelsizdigi, ýnıtarlyǵy, aýmaqtyq tutastyǵy men basqarý úlgisi ózgermeıdi. 

— 6-bapta memlekettik organdarda saıası partııa uıymdaryn qurýǵa jol bermeıtini normany 1-tarmaqtan dál sol redaktsııada 2-tarmaqqa kóshirý usynylady bul norma atalǵan baptyń 2-tarmaǵynyń erejelerin qısyndy túrde tolyqtyrady dep esepteımiz. Atalǵan tarmaqqa sáıkes, memlekettiń qoǵamdyq birlestik isine, al qoǵamdyq birlestiktiń memleket isine zańsyz aralasýyna jáne qoǵamdyq birlestikke memlekettik organ fýnktsııalaryn júkteýge jol berilmeıdi, — dedi Baqyt Nurmuhanov.

Aıta ketelik Baqyt Nurmuhanov azamattardyń keıbir usynystaryn Konstıtýtsııa jobasyna qosýǵa bolatynyn aıtqan.