Teńge ilýden alǵashqy jarys kúninde túrkistandyq sportshylar top jardy

ASTANA. KAZINFORM – Shymkenttegi ortalyq ıppodromda V Dúnıejúzilik kóshpendiler oıyndaryna daıyndyq aıasynda teńge ilýden II Azııa kýbogy bastaldy. 

Ulttyq sport qaýymdastyǵy habarlaǵandaı, baıraqty básekede Qazaqstan, Qyrǵyzstan, Ózbekstan, Reseı, Qytaı, Mońǵolııa jáne Tájikstannan kelgen sportshylar teńge ilýdiń 3 stıli boıynsha baq synap jatyr.

Alǵashqy jarys kúninde Túrkistan oblysynyń jigitteri jeńimpaz atandy. 

Birinshi jarys kúniniń qorytyndysy:

1-oryn - Rahat Qambarov (Túrkistan oblysy)

2-oryn - Ǵalymjan Іzjanov (Túrkistan oblysy)

3-oryn - Qanat Baqtybaı ( Túrkistan oblysy)

Aıta keteıik, búgin atalǵan birinshiliktiń ashylý rásimine Qazaqstan Respýblıkasy Ulttyq sport túrleri qaýymdastyǵynyń prezıdenti Islambek Saljanov, «Teńge ilý» federatsııasynyń prezıdenti Amangeldi Ábdiqadyrov, Shymkent qalasy ákiminiń orynbasary Sársen Quranbek, sondaı-aq jankúıerler, qala turǵyndary men qonaqtary qatysty. 

ІІ Azııa kýbogy Qazaqstan Respýblıkasy Ulttyq sport túrleri qaýymdastyǵy men Shymkent qalasy ákimdiginiń qoldaýymen «Teńge ilý» federatsııasynyń uıymdastyrýymen ótip jatyr.  

Búgin halyqaralyq básekeniń birinshi kúni aıaqtaldy. Aıtýly doda erteń de jalǵasyn tabady.

Esterińizge sala keteıik, Respýblıkalyq Teńge ilý Federatsııasy Qazaqstan Respýblıkasy Ulttyq sport túrleri qaýymdastyǵynyń quramyna kiredi.