Teńge ilý federatsııasy kóshpendiler oıynyna daıyndyqty bastady
ASTANA. KAZINFORM – Búgin Astana qalasyndaǵy Qazaqstan jeńil atletıka kesheninde Ulttyq sport qaýymdastyǵynyń teńge ilý federatsııasy óńirlik teńge ilý sportynyń jattyqtyrýshylarymen keńeıtilgen alqa otyrysyn ótkizdi.
Otyrysta federatsııa prezıdenti Amangeldi Ábdiqadyrov federatsııanyń ótken jylǵy jumysyn qorytyndylap, 2024 jyly respýblıkalyq jáne halyqaralyq deńgeıde ótetin sharalarǵa toqtaldy.
Ulttyq sport túrleri qaýymdastyǵynyń vıtse-prezıdenti Tastanbek Esentaev barlyq federatsııalarǵa 5-shi Dúnıejúzilik kóshpendiler oıynyn joǵary deńgeıde ótkizýge daıyndyqty kúsheıtý mindeti turǵanyn atap ótti.
Otyrysta teńge ilý sportyn odan ári damytý jáne oıyn erejelerin naqtyly júıege keltirip, jetildirý jaǵy da sóz boldy.
Jıyn qorytyndysy boıynsha ulttyq sportty damytýǵa qosqan úlesi úshin birqatar qatysýshylar federatsııanyń alǵys hatymen marapattaldy.
Aıta keteıik, Dúnıejúzilik kóshpendiler oıyndary — etnıkalyq, dástúrli sport túrleri boıynsha ótetin halyqaralyq jarys.
2014, 2016 jáne 2018 jyldary Qyrǵyzstannyń Sholpan Ata qalasynda ótse, 2022 jyly Túrkııanyń Iznık shaharynda tórtinshi Dúnıejúzilik oıyndar uıymdastyryldy.
Endi V Dúnıejúzilik kóshpendiler oıyny bıyl, ıaǵnı 2024 jyly 8-14 qyrkúıek aralyǵynda Astana qalasynda ótedi.
