«Teńge - Qazaqstan táýelsizdiginiń nyshany» kórmesinde teńge men tıyndardyń alǵashqy úlgilerin kórýge bolady - Astana
ASTANA. 13 qarasha. QazAqparat - QR Tuńǵysh Prezıdenti Mýzeıinde Qazaqstannyń ulttyq valıýtasy - teńgeniń engizilýiniń 20 jyldyǵyna arnalǵan «Teńge - Qazaqstan táýelsizdiginiń nyshany» atty qor kórmesi ashyldy.
Kórme QR Tuńǵysh Prezıdenti - Elbasynyń Qory jáne Qazaqstan Respýblıkasynyń Ulttyq Bankimen birlese otyryp, Qazaqstan Respýblıkasy Prezıdentiniń Muraǵaty jáne Qazaqstan Respýblıkasynyń Ulttyq muraǵatynyń qoldaýymen uıymdastyrylyp otyr.
Ekspozıtsııada Táýelsiz Qazaqstannyń ulttyq valıýtasy - teńgeniń qalyptasýy men nyǵaıýynyń 20 jyldyq tarıhyn kóz aldymyzǵa elestetýge múmkindik beretin keń aýqymdy muraǵattyq qujattar, foto- jáne beıne materıaldar usynylǵan. Olardyń qatarynda Qazaqstan Respýblıkasynyń Tuńǵysh Prezıdenti - Elbasy N.Á. Nazarbaevtyń jeke muraǵatynan alynǵan biregeı jumys jazbalary da bar.
Kórmeniń qyzyqty jáne biregeı bolýynyń sebebi, munda alǵash ret teńge men tıyndardyń alǵashqy úlgilerinen bastap, qazaqstandyq valıýtaǵa dúnıejúzilik dańq pen halyqaralyq sarapshylardyń joǵary baǵasyn bergen ınvestıtsııalyq jáne kollektsııalyq monetalarǵa deıingi qazaqstandyq nýmızmatıkanyń tolyq toptamasyn kórýge bolatyndyǵynda.
Qazaqstan teńgesi - bul polıgrafııalyq jáne monetalyq-medalerlik ónerdiń eń jarqyn jáne este qalarlyq jaýharlary ekendigine kórme qonaqtary Qazaqstan Respýblıkasy Ulttyq Bankiniń Banknot fabrıkasy men Qazaqstandyq teńge saraıynyń ónim jınaqtaryn tamashalaı otyryp taǵy bir márte kóz jetkize alady.
Atap aıtqanda, kórme eksponattarynyń arasynda «Jibek joly», «Álemniń eń kishkentaı monetalary», «Haıýandar», «Álemniń áıgili meshitteri», «Shyǵys kúntizbesi», «Sport», «Kóshpendiler altyny», «Ertede soǵylǵan monetalar», «Qazaqstannyń Qyzyl Kitaby», «Arhıtektýralyq jáne tarıhı eskertkishter», «Qazaqstan halqynyń ertegileri», «Respýblıka ıgiligi» jáne basqa da serııalardan altyn jáne kúmisten daıyndalǵan sırek ınvestıtsııalyq jáne estelik monetalardy kórýge múmkindik bolady.
Qazaqstan teńgesi, basqa da nyshandarmen qatar memleket egemendiginiń shynaıy atrıbýty bolyp sanalady jáne paıda bolǵan sátinen bastap, elimizdiń ekonomıkalyq jáne áleýmettik ómirindegi barlyq synaqtardan ótip keledi. Ulttyq valıýtanyń engizilýi - derbes ulttyq ekonomıka qalyptasýynyń bastamasy jáne respýblıkadaǵy naryqtyq qatynastardy qalyptastyrýdaǵy mańyzdy tetigi bolyp sanalady.
