Teńge ilýden Azııa chempıonatynda qazaqstandyqtar alǵashqy eki oryndy aldy
ASTANA. QazAqparat - «Qazanat» atshabarynda teńge ilý, aýdaryspaq sııaqty ulttyq at sporty túrlerinen chempıonattardyń ashylý rásimi boldy, dep habarlaıdy «QazAqparat» HAA Mádenıet jáne sport mınıstrliginiń Sport komıtetine silteme jasap.
Jarysqa sportshylar Túrkııa, Qytaı, Reseı, Mońǵolııa, Aýǵanstan, Ózbekstan, Qyrǵyzstan jáne Tájikstan memleketterinen keldi.
Jarysta teńge ilýden el chempıony Maǵjan Saparbek pen Azııa chempıony, «Aq bıdaı» aýyldyq oıyndarynyń jeńimpazy Ǵalymjan Іzjanovtar birinshi jáne ekinshi oryndardy ózara bólisti. Úshinshi orynǵa qyrǵyzstandyq sportshy Amantur Mınýrýýlý turaqtady.
Osy kúni aýdaryspaqtan III Azııa chempıonaty bastaldy. El namysyn bul synda Azamat Serǵazın, Shyńǵyshan Erjanov, Esimhan Rahmátilla, Syrym Іzbasarov, Birjan Qosalıev qorǵady. Búgin sportshylar eki salmaq dárejesinde synǵa tústi. 60 kelige deıingi salmaq dárejesinde Azamat Serǵazın birinshi oryndy jeńip aldy. 70-kelige deıingi salmaqta birinshi oryndy Shyńǵyshan Erjanov aldy. Erteń chempıonattardyń ekinshi jarys kúni.
Teńge ilý men aýdaryspaq sporttarynyń jalpy syılyq qory 14 mln teńge.
Aıta keteıik, aýdaryspaq sportynan birinshi Azııa chempıonaty 2014 jyly Astanada ótti. Ekinshi chempıonat 2016 jyly Qytaıda, 2015 jyly teńge ilýden Azııa chempıonaty Qazaqstan astanasynda ótti. Bıylǵy jyly atalǵan jarystar Astananyń 20 jyldyǵy aıasynda ótip jatyr.
