Teńge ilýden Azııa Chempıonaty: І jáne ІІ oryn qazaq sportshylarynyń qanjyǵasynda
ASTANA. QazAqparat - Astanadaǵy «Qazanat» atshabarynda búgin teńge ilýden Azııa Chempıonaty máresine jetti. Saıysta birinshi jáne ekinshi oryndy Qazaqstannyń namysyn qorǵaǵan Maǵjan Saparbek pen Ǵalymjan Іzjanov ıelendi, dep habarlaıdy QazAqparat tilshisi.
Azııa Chempıonatynyń jeńimpazdaryn marapattaý rásimine qatysqan Qazaqstan Respýblıkasynyń Mádenıet jáne sport mınıstri sporttyń damýyna úles qosqan azamattarǵa alǵys bildirdi.
«Bul aıtýly shara bizdiń ásem de kórikti elordamyz - Astananyń 20 jyldyǵyn atap ótý aıasynda ótkizilip otyr. Elbasy Nursultan Ábishuly sporttyń damýyna, ásirese ulttyq sport túrleriniń damýyna erekshe kóńil aýdaratynyn bilesizder. Búgingi sharany ótkizýge negiz bolyp otyrǵan ulttyq sporttyń damýyna zor úles qosyp júrgen Qaırat Satybaldyuly, Bekbolat Tileýhan myrzaǵa, sonymen qatar Halyqaralyq Qazaq kúresi federatsııasynyń basshysy Qanat Aldabergenulyna, meımandarǵa alǵys bildiremiz», - dedi Arystanbek Muhamedıuly.
Teńge ilýden Qazaqstan quramasynyń bapkerler alqasy respýblıka chempıony Maǵjan Saparbek pen 2015 jylǵy Azııa chempıony, 2017 jylǵy «Aq bıdaı» aýyl sporty oıyndarynyń jeńimpazy Ǵalymjan Іzjanovqa senim artqan bolatyn. Maıtalmandar údeden shyǵa bildi. Qurama bapkeri Nurken Baıbórıevtiń úmitin aqtaǵan kil myqtylar alǵashqy eki oryndy qanjyǵasyna baılady.
Teńge ilýden úshinshi oryn qyrǵyz sportshysy Amantýr Mınýýrýýlýǵa buıyrdy. Júldeli tórtinshi jáne besinshi oryn Mońǵolııadan kelgen Serik Jeńisbek pen Boborodjan Mýsoevtyń enshisine buıyrdy.
Aıta ketsek, erteń «Qazanatta» aýdaryspaqtan III Azııa chempıonaty ótedi. Bes salmaq boıynsha synǵa túsetin 9 el sportshylarynyń saıysy asa tartysty ótetini anyq. Bul dodada Qazaq eliniń namysyn Azamat Serǵazın, Shyńǵyshan Erjanov, Esimhan Rahmátilla, Syrym Іzbasarov, Birjan Qosalıev sekildi azamattar qorǵaıdy. Asa aýyr salmaqtaǵy Birjan Qosalıev - eki dúrkin Azııa chempıony (2014, 2016 ). 2017 jyly Astanada ótken halyqaralyq týrnırdiń asa aýyr salmaqtaǵy jáne absolıýtti saıystaǵy jeńimpazy. Syrym Іzbasarov - aýyr salmaqta eki dúrkin Azııa chempıony (2014, 2016). Azııanyń 2016 jylǵy absolıýtti jeńimpazy. A. Serǵazın, Sh. Erjanov, E. Rahmátilla - talaı jarysta top jarǵan myqty sportshylar. Ulttyq quramanyń jetekshileri - Qýanyshbek Quramaev pen Janbatyr Bekmusaev.
Teńge ilý men aýdaryspaqtan 2018 jylǵy Azııa chempıonaty 2 maýsym kúni aıaqtalady.
Aıta ketsek, qos ulttyq sport túrinen Azııa Chempıonattaryna 9 elden, atap aıtqanda, Qazaqstan, Ózbekstan, Qyrǵyzstan, Tájikstan, Mońǵolııa, Reseı, Aýǵanstan, Qytaı, Túrkııadan 54 sportshy, al jalpy jarysqa qatysatyn delegatsııa múshelerin qosqanda 100-ge tarta adam qatysýda. Chempıonattardyń jalpy júlde qory - 14 mln teńge.
