Teńge erkin aınalymǵa shyqqan soń, valıýtamen alypsatarlyq áreket jasaý kelmeske ketedi - Q. Kelimbetov
ASTANA. QazAqparat - Teńge erkin aınalymǵa shyqqan soń, valıýtamen alypsatarlyq áreket jasaý kelmeske ketedi. Bul týraly búgin QR Prezıdenti janyndaǵy Ortalyq kommýnıkatsııalar qyzmetindegi brıfıngte QR Ulttyq bankiniń tóraǵasy Qaırat Kelimbetov málimdedi.
Onyń aıtýynsha, endi naryq jaǵdaıynda teńgeniń baǵamyna qatysty túsinbeýshilikter oryn almaıdy.
«Teńge erkin aınalymǵa shyqqan soń, valıýtamen alypsatarlyq áreket jasaý kelmeske ketedi. Teńgeniń baǵamy ashyq, túsinikti jaǵdaıda qalyptasady. Aqsha aıyrbastaý pýnktteri óz betterinshe kóterińki valıýta baǵamyn qoıa almaıdy. Jáne eń , Qazaqstan jańa aqsha-nesıe saıasatyna kóship, ınflıatsııalyq targetteý rejimin ornatqan soń, ekonomıka birtindep dollarsyzdandyryla bastaıdy. Mysaly, osy ınflıatsııalyq targetteý rejimine kóshken Avstralııa, Jańa Zelandııa, qala berdi Polsha men Reseıde ekonomıka eleýli túrde dollarsyzdandyryldy. Biz úshin ekonomıkany dollarsyzdandyrý - orta merzimdik mindet. Biz ony kezeń-kezeńmen oryndap jatyrmyz», - dedi Q. Qelimbetov.
Sonymen qatar, ol elimizde ekinshi dárejeli bankterdiń sońǵy jyldary negizinen halyqqa nesıe berýmen emes, valıýtalyq operatsııa jasaýmen aınalysyp kelgendigin ashyq aıtty.
«Men bankterdiń bul áreketterine jaqsy nemese jaman dep aıdar taqqym kelmeıdi. Biraq ashyǵy sol, bankter «aqsha taǵy da qunsyzdanýy múmkin» degen oımen sońǵy jyldary negizinen halyqqa nesıe berýmen emes, valıýtalyq operatsııalar jasaýmen aınalysyp keldi. Sońǵy ýaqytta nesıe berý azaıyp, olardyń paıyzdyq mólsherlemeleri kerisinshe artyp ketti. Biz sońǵy eki jyl ishinde ekinshi dárejeli bankterge Ulttyq bank, biryńǵaı zeınetaqy jınaqtaýshy qory, SVOP operatsııalary arqyly shamamen 2 trln. teńge ótimdilik berippiz. Al bul aqshalar valıýtaǵa aınalyp jatty. Sonymen qatar, bankterdiń klıentteri de óz depozıtterin dollarlyq depozıtterge aınaldyrýmen boldy. Mine osyndaı tuıyq sheńber qalyptasty. Biz búgin osy sheńberdi buzdyq. Endi eshkim «baǵa ákimshilik taraptan belgilendi», - dep aıta almaıdy. Endi baǵany naryq belgileıdi. Endi aldaǵy bir aptadaı ýaqyt teńgeniń baǵamy birese joǵary, birese tómen túsýi múmkin. Al odan keıin shynaıy suranys pen usynystyń nátıjesi boıynsha anyqtalady», - dedi Q. Kelimbetov.
Budan ózge, bas bankır teńgeniń erkin aınalymǵa shyǵý shaǵyn jáne orta bıznes salasyna da oń áser etetindigin jetkizdi.
«Bankterdiń basty qyzmeti tutynýshylardy nesıemen qamtamasyz etý ekeni belgili. Endi QR Ulttyq banki tuńǵysh ret ekinshi dárejeli bankterdi júıeli negizde ótimdilikpen qamtamasyz etýshi basty organǵa aınalady. ıAǵnı endi negizinen birkúndik mólsherlemeler qoıylady. Solar arqyly qarjy ınstıtýttary alys-beriske, ıaǵnı qarjy kózderine qol jetkize alady. Ótimdilik mólsherlemesin basqarý arqyly bank sektoryndaǵy nesıe mólsherlemelerin basqarýǵa qol jetkiziledi. Demek, nesıeler shaǵyn jáne orta bıznes sýbektileri úshin qoljetimdi bola túsedi degen sóz», - dep sózin túıindedi Q. Kelimbetov.
