Teńge eń tartymdy valıýtalardyń biri – Tımýr Súleımenov
ASTANA. KAZINFORM – Ulttyq bank tóraǵasy Tımýr Súleımenov teńge baǵamyna qatysty qazirgi ahýalǵa oraı pikir bildirdi.
- Qazaqstan teńgesi óziniń turaqtylyǵyn dáleldedi. Esterińizde bolsa, jekelegen sarapshylar kezinde 1 dollar myń teńge, 2 myń teńge bolatynyn aıtqan edi. Sol ýaqytta biz oǵan irgeli de, naryqtyq da alǵysharttardyń múldem joq ekenin aıtqan bolatynbyz. Degenmen, tájirıbe kórsetip otyrǵandaı, teńge – turaqty valıýta. Ótken jyldyń qorytyndysynda ol óte jaqsy tabystylyǵyn kórsetti. Qazirgi ýaqytta eń tartymdy valıýtalardyń biri. Sizder de halyqaralyq reıtıngterden, basqalarynan kórip otyrsyzdar, - dedi Ulttyq bank tóraǵasy Májilistiń jalpy otyrysynan keıingi brıfıngide.
Onyń paıymynsha, dál qazirgi ýaqytta Qazaqstanda táýekel men tabystylyq araqatynasy álemdegi eń úzdikterdiń biri sanalady.
- Sondyqtan ol ınvestıtsııa tartyp, soǵan oraı teńge nyǵaıa tústi, - dedi Tımýr Súleımenov.
Buǵan deıin Ulttyq bank tóraǵasy Tımýr Súleımenov dollar baǵamynyń quldyraý sebebin ataǵan edi.
