Teńge dızaınyn jasaǵan avtorlardyń biri Tımýr Súleımenov ómirden ozdy
ALMATY. QazAqparat - Alǵashqy teńgeniń dızaınyn jasaǵan avtorlardyń biri Tımýr Súleımenov ómirden ozdy. Bul týraly QazAqparat tilshisine sýretshiniń qyzy Sáýle Súleımenova aıtty.
Tımýr Súleımenov búgin, tańerteń 75 jasyna qaraǵan shaǵynda meńdegen aýrýdan kóz jumǵan.
"Ákemdi aqtyq saparǵa shyǵaryp salý sharasy 11 mamyrda Á. Qasteev atyndaǵy mýzeıde ótedi", -dedi Saýle Súleımenova.
Tımýr Bımashuly Súleımenov 1943 jyly 14 aqpanda Ońtústik Qazaqstan oblysynyń Qarabulaq aýylynda týǵan. 1965 jyly - Lenıngrad qurylys-ınjenerlik ınstıtýtyn, 1970 jyly Qazaq polıtehnıkalyq ınstıtýtyn (1970) bitirgen. Tımýr Súleımenov - sáýletshi, Qazaq bas sáýlet-qurylys akademııasynyń qurmetti professory. Halyqaralyq óner akademııasynyń akademıgi, QR Kórkemóner akademııasynyń qurmetti akademıgi, Qazaqstandyq dızaın mektebiniń negizin salýshy. Almaty oblysyndaǵy «Cherkassk qorǵanysynyń batyrlaryna» memorıaldyq kesheniniń; Túrkistan qalasyn qaıta qurý jáne tarıhı-mádenı týrıstik ortalyqqa aınaldyrý jobasynyń avtory. Shymkent jáne Janatas qalalaryn salýdyń bas josparlaryn ázirleýge, Túrkistan qalasynyń tarıhı aımaǵyn qalpyna keltirýge, Q.A. ıAsaýı kesenesi aınalasyndaǵy tarıhı aımaqty qaıta qurý jobasyna qatysqan. «QR Respýblıkalyq stıli» keshendi memlekettik dızaın-baǵdarlamasynyń jetekshisi; ulttyq valıýta dızaınyn jasaý, jobalaý, QR Qarýly Kúshteri dızaın-baǵdarlamalaryn jasaýmen aınalysqan jumys toptarynyń jetekshisi.
1965 jyldan - «Qazqalaqurylysjobalaý»» jobalaý ınstıtýtynyń sáýletshisi, Almaty qalasy Kalının aýdanynyń bas sáýletshisi, 1968 jyldan - «Almaatagıprogor» ınstıtýtynda sáýletshiler tobynyń jetekshisi, «Qazqalaqurylysjobalaý» ınstıtýtynyń jobalar boıynsha bas sáýletshisi, 1982 jyldan - Qazaqstannyń Kórkemdik qorynyń bas sýretshisi, qalalyq ortanyń dızaıny sheberhanasynyń jetekshisi, 1987 jyldan - «Qazaqstan Dızaınerler odaǵy» RQB basshysy qyzmetin atqarǵan. Marqumnyń artynda jary, 2 balasy men 2 nemeresi qaldy.
