Teńge baǵamynyń tómendeýine esh negiz joq - Ulttyq bank
ASTANA. QazAqparat - Qazaqstan Ulttyq banki valıýta naryǵyndaǵy ahýaldyń turaqty ekenin jáne teńge baǵamyn negizsiz tómendetýge sebep joq ekenin jarııa etti, dep habarlaıdy QazAqparat tilshisi.
«Qazaqstan Ulttyq banki naryqqa turaqty túrde monıtorıng júrgizedi jáne qajet bolǵan jaǵdaıda ulttyq valıýta baǵamynyń ornyqtylyǵyn qamtamasyz etý jónindegi shara qabyldaıdy. Qazaqstan Ulttyq banki jáne ekinshi deńgeıdegi bankter halyq jáne bıznes tarapynan suranysty qanaǵattandyrý úshin qolma-qol, sol sııaqty qolma-qol emes shetel valıýtasynyń jetkilikti qoryna ıe. Qazaqstan Ulttyq banki bank júıesin shetel jáne ulttyq valıýtasynyń qajetti sanymen ýaqtyly tolyqtyryp otyrýǵa daıyn», - dep málimdedi elimizdiń bas qarjy retteýshisi.
Ulttyq bank málimetinshe, teńgeniń baǵamyn qalyptastyrý irgeli ishki jáne syrtqy faktorlardyń yqpalymen jalǵasady. Olar qazirgi ýaqytta qolaıly qalyptasyp otyr. Munaı baǵasy barreli úshin 65-70 AQSh dollary aýqymynda tur. Reseı rýbli nyǵaıý úrdisin kórsetip, ekonomıkalyq ósý qarqyny ornyqty bolyp qalýda, tólem balansynyń jaı-kúıi turaqty.
Teńgeniń aǵymdaǵy baǵamy turaqty jáne «KASE» Qazaqstan qor bırjasynda Qazaqstan Ulttyq bankiniń qatysýynsyz qalyptasady. Valıýta naryǵyndaǵy yqtımal qubylmalylyq irgeli faktorlardyń áreketine negizdelmegen jáne qysqa merzimdi sıpatta ǵana bolýy múmkin.
«Osy jaǵdaılarda Ulttyq bank yqtımal shyǵyndardy boldyrmaý úshin valıýtany satyp alý men satý boıynsha baǵa belgileýdiń aıyrmasynda, sol sııaqty teńgeniń valıýtalyq baǵamyn túzetý nátıjesinde de alypsatarlyq valıýtalyq operatsııalardy júzege asyrmaýdy usynady. Qazaqstan Ulttyq banki qolma-qol shetel valıýtasy naryǵyndaǵy ahýaldy baqylap otyr. Aıyrbastaý pýnktterinde valıýtalardy aıyrbastaý baǵamyn kóterý jaǵdaılary týyndaǵan kezde Qazaqstan Ulttyq bankiniń fılıaldary olardy qaraýǵa jáne naryqty turaqtandyrý boıynsha qajetti jedel áreket qabyldaýǵa daıyn», - delingen taratylǵan aqparatta.
