Teńge baǵamynyń tómendeýi JІÓ ósimine áser etedi - Qarjy mınıstri
ASTANA. QazAqparat - Teńge baǵamynyń tómendeýi jalpy ishki ónim ósimine áser etedi. Bul týraly búgin QR Prezıdenti janyndaǵy Ortalyq kommýnıkatsııalar qyzmetinde ótip jatqan brıfıngte QR Premer-Mınıstriniń orynbasary - Qarjy mınıstri Baqyt Sultanov málim etti.
«Bul shara búginde álemdik naryqta kórshilerimizde oryn alyp jatqan jaıttardyń saldary ári bizdiń eksportshylarymyzdyń básekege qabilettiligin qoldaý úshin qajet», - dedi ol.
Onyń atap ótýinshe, QR Úkimeti el damýynyń negizgi makro jáne áleýmettik-ekonomıkalyq kórsetkishteriniń qunsyzdaný áserine baǵalaý jumystaryn júrgizgen.
«Bizdiń baǵalaýymyzsha, devalvatsııa JІÓ ósimine áser etetin bolady. Óıtkeni, taýaryn eksportqa jiberetin óndirýshilerimizdiń eksporttyq túsimderi kóbeıetin bolady, saýda balansyna da áser etedi. Munyń tikeleı áserinen árıne, bıýdjetke de túsimder kóteriledi. Buǵan qosa ol bizderdiń shet elderdegi dıpmıssııalarymyzdyń qaryzdaryna, qarjylandyrylýyna qyzmet kórsetýge arnalǵan shyǵystaryn arttyrady. Degenmen de devalvatsııadan keıin bıýdjetke qosymsha túsimder ósimi qosymsha kirister ósiminen asyp túsetindigi boljanýda», - dedi B.Sultanov.
Esterińizge sala keteıik, búgin QR Ulttyq banki 2014 jyldyń 11-aqpanynan bastap teńgeniń burynǵy deńgeıin saqtap turýdan, valıýtalyq ınterventsııalardyń kólemin azaıtýdan, teńgeniń aıyrbas kýrsyn qurý protsesine aralasýdan bas tartý týraly sheshim qabyldaǵanyn jarııa etken edi. Sondaı-aq teńge kýrsynyń jańa baǵamy 185 AQSh dollary tóńireginde bolatyndyǵyn habarlaǵan-dy.
