Teńge baǵamynyń ózgerýi otandyq avtonaryqqa qalaı áser etedi - saýalnama
ASTANA. QazAqparat - Qazaqstan avtobıznes qaýymdastyǵy 2018 jyldyń qorytyndysy boıynsha resmı dılerler arasynda saýalnama júrgizip, Qazaqstannyń avtonaryǵyna taldaý jasady.
Saýalnamaǵa eldegi jańa avtokólikterdiń resmı satylymynyń jartysy tıesili kompanııalardyń basshylary qatysyp otyr, dep habarlaıdy QazAqparat tilshisi.
2018 jyly jańa avtokólikterdi satý naryǵyndaǵy dınamıkaǵa qandaı faktorlar áser etti? Bul suraqqa jaýap bergen dılerler eń aldymen avtobıznesti nesıe sharttarynyń kúrdeliligi, valıýta baǵamynyń ózgerýi jáne tutynýshylardyń múmkindiginiń azaıǵany mazalap otyrǵanyn alǵa tartqan.
«Saýalnama qorytyndysy boıynsha, dılerlerdiń 35,7 paıyzy 2018 jyly satylym josparly kórsetkishke saı bolǵanyn, al 35,7 paıyzy josparly kórsetkishten joǵary bolǵanyn, al qalǵany, ıaǵnı 28,6 paıyzy tómen bolǵanyn aıtyp jaýap bergen. 2018 jyly valıýta baǵamynyń ózgerýi jańa avtokólikterdiń baǵasynyń 11 paıyzǵa kóterilýine alyp kelgen. Dese de, keıbir kompanııalar qaıta satý aǵymynyń júrgizilýine baılanysty kerisinshe jańa avtokólikterdiń tómendegenin aıtqan», - delingen Qazaqstan avtobıznes qaýymdastyǵynyń habarlamasynda.
Saýalnamaǵa qatysqan dıllerler 2019 jyly jańa avtokólikterdiń satylymy byltyrǵydan qaraǵanda joǵary bolýy múmkin dep boljap otyr.
Eske sala ketsek, 2018 jyly Qazaqstanda jańa kólikterdi satyp alýǵa 1,5 mlrd dollarǵa jýyq qarjy jumsalǵan bolatyn.
«12 aıda resmı dılerler 57 919 avtokólik ótkizip, bul kórsetkish bir jyl burynǵy deńgeıden 24,9 paıyzǵa joǵary boldy. Jalpy, ótken jyly elimizdiń turǵyndary jańa jeńil kólikterdi satyp alýǵa 496,6 mlrd teńge jumsap, bul qarjy 2017 jylǵy kórsetkishten 35,8 paıyzǵa artyq boldy», - dep habarlanǵan edi «QazAvtoÓnerkásip» avtokólik salasyndaǵy kásiporyndar odaǵynyń habarlamasynda.
