Teńge baǵamynyń kóterilýin sarapshylar kóńil-kúıge teńedi
ALMATY. QazAqparat - KASE Qazaqstan qor bırjasynda jaqynda bolǵan teńgeniń kúrt joǵarylaýyn túsindirdi, dep habarlaıdy QazAqparat tilshisi.
Aıta ketý kerek, 2-3 tamyzda aqsha aıyrbastaý pýnktterindegi dollar baǵamy 335,72 teńgege deıin kóterilip ketken bolatyn.
«Birinshiden, syrtqy faktorlar yqpal etti. Atap aıtqanda, kórshiles Reseı eline álemdik qaýymdastyq tarapynan salynyp jatqan sanktsııalardyń áseri kóp boldy. Kórshimiz sanktsııa bolatynyn bilip aldyn ala qamdanǵan bolý kerek. Óıtkeni, rýbl baǵamy (59-60) ózgere qoıǵan joq. «Keıbir» aqparat quraldarynyń arqasynda bizdiń naryqqa da qaýeset áser etti. Sonyń saladrynan naryqta ishki faktor qalyptasty. Atap aıtqanda, dollarǵa degen suranys kóbeıip ketti. Ádette kúnine 150-350 mln teńgeden aspaıtyn aınalym, 2-3 kúnderi 500 mln teńgeden asyp ketti», - dedi «Qazaqstan qor bırjasy» AQ basqarma tóraǵasynyń orynbasary Andreı Tsalıýk.
Almatyda 2-3 tamyz kúnderi aqsha aıyrbastaý pýnktterinde óte belsendi jumys boldy.
«Aqsha aıyrbastaý pýnktteri men ekinshi deńgeıli bankter bizden aqparatty shyqqan mezetinde alady. Kýrs aıyrmasyn olar shetindegi trendten kóredi. Osy joly satyp alý men satý arasyndaǵy aıyrma (spred) 1,5-3 teńge kóleminde qaldy. Naryqta belgisizdik oryn alǵan kezde spred 6-ǵa deıin kóteriledi. Bankter men aıyrbastaý pýnktteri ony shyǵynǵa batpaý úshin isteıdi. Tamyzdaǵy jaǵdaı boıynsha spred bırjada saýdalanǵan valıýta baǵamynyń kóleminde boldy. Sondyqtan, bul ýaqytsha qubylys ekeni áýel bastan belgili boldy», - dedi Andreı Tsalıýk.
Qazirgi tańda bırja mamandarynyń aıtýynsha, naryqta jaǵdaı turaqtandy. Buǵan munaı baǵasynyń qymbattaýy yqpal etti.
Qazir dollardyń teńgege shaqqandaǵy baǵamy 331,9-332,9 bolyp tur.
