Teńge baǵamynyń boljamyn tap basyp aıtatyn sarapshy az - Danııar Aqyshev
ALMATY. QazAqparat - Almatyda ótken baspasóz máslıhatynda QR Ulttyq bankiniń tóraǵasy Danııar Aqyshev teńge baǵamynyń qalyptasýyna qatysty túsinikteme berdi, dep habarlaıdy QazAqparat tilshisi.
Bas bankır teńge baǵamynyń qubylmalylyǵy birneshe faktorǵa baılanysty ekenin aıtty. Munaı baǵasynyń ózgerýinen Qazaqstannyń tabatyn dollarlyq tabysy ózgerip, ol óz kezeginde teńge baǵamyna yqpal etedi.
Danııar Aqyshev ulttyq valıýtanyń qunyna yqpal ete alatyn kelesi faktordy atady.
«Ókinishke oraı teńge baǵamyna aqparattyq shabýyl men alyp satýshylardyń áreketi de áser etip otyr. Qyrkúıekte barlyq sarapshylar EKSPO-dan keıin teńge baǵamy qulaıdy dep boljaǵan bolatyn. Óıtkeni, Ulttyq bank teńge kýrsyn ustap otyr degen bolatyn. Bulaı bolǵan joq. Sarapshylar birden pikirin ózgertti. Qoǵamdyq pikirdi basqarý ońaı. Men óz áriptesim Grıgorıı Marchenkomen kelisemin. Qaýeset sózge ermes úshin bizge bárimizge biliktiligimizdi arttyrý kerek», - dedi bas bankır D.Aqyshev.
Onyń aıtýynsha, teńge baǵamyn tap basyp aıtatyn sarapshy az.
«Kýrs álem naryǵyndaǵy ózgeriske qaraı qubyla bermeıdi. Ol birneshe kórsetkishtermen qalyptasady. Teńge baǵamyn tap basyp aıtatyn sarapshylar, tipti eýro-dollar jubynyń boljamyn aıtatyn adamdar óte az», - dedi Aqyshev.
