Teńge baǵamynyń bir aıda álsireýi: Ulttyq bank túsinik berdi
NUR-SULTAN. QazAqparat –QR Ulttyq bank tóraǵasy Erbolat Dosaev teńge baǵamynyń tómendeýine qatysty túsinik berdi, dep habarlaıdy QazAqparat tilshisi.
«Bıylǵy maýsym aıynyń sońynan 10 tamyz aralyǵyndaǵy kezeńde túrik lırasy 6,9 paıyzǵa, Indonezııa rýpııasy – 3 paıyzǵa, Argentına pesosy 3,3 paıyzǵa arzandady. Jalpy úrdis aıasynda Reseı rýbli de 3,6 paıyzǵa álsiredi», - dedi UB basshysy búgingi Úkimet otyrysynda.
Onyń sózine qaraǵanda, damýshy elder valıýtalarynyń álsireýi aıasynda teńgeniń aıyrbastaý baǵamy bıylǵy shildeden bastap 10 tamyzdaǵy jaǵdaı boıynsha 1 AQSh dollary úshin 404,07 teńgeden 418,31 teńgege deıin 3,5 paıyzǵa álsiredi.
«Teńgeniń álsireýi bir barrel úshin 40 AQSh dollarynan joǵary deńgeıde tirkelgen munaı baǵasyn belgileýmen tejeledi. 7 tamyzda munaı baǵasy munaı qorynyń tómendeýi jáne OPEK+ mámilesiniń saqtalýy aıasynda bir barrel úshin 44,4 dollar deńgeıinde bekidi», - dedi E. Dosaev.
Respýblıkalyq bıýdjetke kepildik berilgen transfertti bólý maqsatynda Ulttyq qor aktıvterin konvertatsııalaý, sondaı-aq kvazımemlekettik sektor kompanııalarynyń eksporttyq valıýtalyq túsiminiń bir bóligin mindetti satý jónindegi uzartylǵan sharalar ulttyq valıýtaǵa ishki qoldaý kórsetti.
