Teńge baǵamyndaǵy ózgeris kommýnaldyq qyzmet baǵasyna áser etpeıdi - Astana
ASTANA. QazAqparat - AQSh dollarynyń teńgege shaqqandaǵy baǵasynyń kóterilýi kommýnaldyq qyzmet baǵasyna áser etpeıdi.
Bul týraly Astana qalasy ákimdiginde ótken jıynda málim boldy. Jergilikti bılik ókilderi, baqylaýshy organdar, saýda ortalyqtary men bazar qyzmetkerleri jasandy jolmen taýar baǵasynyń kóterilýine jol bermeýdiń amalyn qarastyrdy.
«Qazir negizsiz taýar baǵasyn kóterip otyrǵan kásipkerler bar. Taýardaǵy baǵa men kassadaǵy baǵa sáıkes kelmeıdi. Al, tutynyp otyrǵan taýarymyzdyń basym bóligi otandyq óndiristiki. Sondyqtan mundaı bassyzdyqpen qatań kúres júrgizýdi bastap ta kettik»,- dedi Astana qalasy ákiminiń orynbasary Ersaıyn Naǵaspaev.
Teńge baǵamynyń ózgerisin paıdalanyp, paıdaǵa kenelemin degen kásipkerdiń máselesi qatań qaralatyn bolady. Azyq-túlikten bólek tarıf baǵasyn ustap qalý jospary da ázirlendi. Aıta keteıik, qala ákimdigi kún saıyn negizgi taýarlardyń baǵasyn baqylap otyrady, dep habarlaıdy astana.kz.
