Teńge baǵamyna munaı baǵasynyń tómendeýi yqpal etedi – Ulttyq bank

ALMATY. QazAqparat – Qazaqstan Ulttyq Banki Monetarlyq operatsııalar departamentiniń dırektory Nurjan Tursynhanov teńge baǵamyna qatysty oıymen bólisti, dep habarlaıdy QazAqparat tilshisi.

Ótken jumadan beri teńge baǵamy 0,54%-ǵa álsirep, búgin tańerteń 430,20 teńge boldy.

«Eń aldymen ulttyq valıýtaǵa munaı baǵasynyń tómendeýi yqpal etedi. Brent surypty munaı baǵasy ótken jumamen salystyrǵanda 3%-dan astam tómendedi jáne búgin bir barrel úshin $40,5 boldy. Baǵanyń tómendeýine AQSh, Frantsııa men Reseıdi qosa alǵanda birqatar elderde COVID-19-dy juqtyrý jaǵdaılary sanynyń kúrt ósýine baılanysty suranystyń baıaýlaýynan qaýiptený yqpal etedi. Lıvııa ulttyq munaı korporatsııasynyń munaı óndirý deńgeıin táýligine 1 mıllıon barrelge deıin qalpyna keltirý týraly habarlamasy munaı baǵasyna qosymsha qysym ákeldi», - dedi Nurjan Tursynhanov.

Onyń aıtýynsha, AQSh-taǵy shıki munaı qorynyń ósýi týraly jańalyqtar munaı baǵasyna qysym kórsetýdiń qosymsha faktory boldy.

«Álemdik qor naryqtarynda da jaǵdaı ázirge kóńil kónshiterlik emes. Ekonomıkany qoldaý sharalary men fıskaldyq sharalar toptamasy boıynsha kelissózderdegi úzilis, sondaı-aq epıdemıologııalyq jaǵdaıdyń nasharlaýy aıasynda AQSh-tyń aktsııalar naryǵy saýda-sattyqtyń sońǵy úsh kúninde quldyrap jatyr. Eýropa naryqtary syrqattanýshylar sanynyń ósýine baılanysty engizilgen shekteý sharalary aıasynda tómendep barady.

Osynyń áserinen damýshy elderdiń aktıvterine suranysynyń tómendeýi baıqalady. Jumamen salystyrǵanda Meksıka pesosy dollarǵa shaqqanda 0,7%-ǵa, Reseı rýbli 1,5%-ǵa, Brazılııa realy 1,6%-ǵa, al Túrkııa lırasy 2,9%-ǵa álsiredi. Túrik lırasynyń baǵamy Túrkııanyń Frantsııamen qarym-qatynasyndaǵy shıelenisterge jáne ortalyq banktiń negizgi mólsherlemeni ózgerissiz saqtaý týraly sheshimine baılanysty rekordtyq mınımýmdy jańartty. Reseı rýbli salyq aptasy aıaqtalǵannan keıin jáne damýshy elder naryqtaryndaǵy jalpy úrdisten keıin álsiredi. Bıýdjettik qaǵıdalar jáne Sberbank aktsııalary boıynsha mámileden valıýta qaldyǵyn satý sheńberindegi turaqty operatsııalardan basqa, RF Ortalyq banki 26 qazannan bastap Qarjy mınıstrliginiń «Aeroflot» JAQ aktsııalarymen mámilesi sheńberinde valıýtany qosymsha satýǵa kiristi», - dedi sarapshy.

Teńgeniń aıyrbastaý baǵamy energııa tasymaldaýshylar naryqtaryndaǵy jáne damýshy elder naryqtaryndaǵy negizgi úrdisterge sáıkes kelip otyr.