Teńge baǵamyna boljam jasaldy
ASTANA. QazAqparat - Munaı baǵasynyń ósimine qaramastan teńgeniń álsireýi Qazaqstan bıýdjetiniń buǵan deıingi jyldardaǵydaı munaıdan túsetin kiriske barynsha táýeldi bolmaýymen baılanysty oryn alýy yqtımal.
Mundaı pikirdi «Alparı» kompanııasynyń saraptamalyq departamenti dırektorynyń orynbasary Natalıa Mılchakova bildirdi, dep habarlaıdy QazAqparat.
«Negizinen sońǵy birneshe jyl boıy munaı baǵasynyń dınamıkasy men teńgeniń aıyrbas baǵamy arasynda turaqty ózara baılanys joq. Munyń Qazaqstan bıýdjetiniń buǵan deıingi jyldardaǵydaı munaıdan túsetin kiriske barynsha táýeldi bolmaýymen baılanysy basymyraq bolyp otyr. Búgingi kúni munaı men gaz eksportynan túsetin kiris shamamen 35-37 paıyzdy quraıdy», - dedi Natalıa Mılchakova.
Onyń aıtýynsha, valıýtalyq treıderler áli de bolsa teńgege «munaı» valıýtasynyń biri retinde qaraýǵa daǵdylanǵan. Sońǵy birneshe jyl boıy teńge baǵamyna rýbldiń aıyrbas baǵamynyń yqpaly birshama joǵary bolýda. Degenmen sarapshy rýblge teńge baǵamynyń tikeleı yqpaly joq ekendigin de basa aıtty. Reseı rýbli qazaqstandyq teńgege qaraǵanda birshama qubylmaly valıýta sanalady.
«Alaıda kúni boıǵy saýda barysynda rýbl men teńgeniń bir baǵytta bolatyndyǵy jıi kezdesedi. Al bul valıýta naryǵynyń Reseı men Qazaqstan ekonomıkalaryn bir-birimen tyǵyz táýeldi dep qabyldaıtyndyǵyn bildiredi. Bul tań qalarlyq jaıt emes. Óıtkeni, Qazaqstan men Reseıdi Eýrazııalyq ekonomıkalyq odaqqa múshelik biriktiredi. Biraq Qazaqstan men Reseı munaı men gaz eksporty salasynda básekeles sanalady. Eger, máselen Reseı rýbldi devalvatsııalasa, onda onyń eksporttyq taýarlary avtomatty túrde básekelesteriniń dál sondaı taýarlaryna qaraǵanda básekege qabiletti bolyp shyǵa keledi», - dedi ol.
Natalıa Mılchakovanyń paıymynsha, 2014-2015 jyldarda reseılik rýbldiń devalvatsııaǵa ushyraýyna 2015 jyly Qazaqstan teńgesiniń devalvatsııalanýy negiz bolǵan. Qazirgi ýaqytta Amerıka Qurama Shttattary Reseı Federatsııasyna qarsy sanktsııalaryn qatańdatýǵa nıet tanytyp otyr. Osyǵan baılanysty Qazaqstan sanktsııalardyń qatańdaýy reseılik ekonomıkaǵa teris yqpal etýi múmkin dep qaýiptenýde. Mundaı jaǵdaıda Reseıge eksporttalatyn Qazaqstan taýarlaryna suranystyń tómendeýi yqtımal.
«Bizdiń boljamymyzsha, tamyz aıynyń basynda dollarǵa shaqqandaǵy teńge baǵamy 326-329 teńge, rýblge shaqqanda 5,48-5,62 teńge bolady», - dedi sarapshy.
