Teńge baǵamyna baılanysty «Qoljetimdi baspana» baǵdarlamasyna ózgeris engizilýi múmkin
Bul týraly búgin QR Prezıdenti janyndaǵy Ortalyq kommýnıkatsııalar qyzmetindegi baspasóz máslıhatynda Ekonomıka jáne bıýdjettik josparlaý mınıstri Erbolat Dosaev málim etti.
«Teńgeniń AQSh dollaryna shaqqandaǵy baǵamynyń ózgerýi sebebine baılanysty «Turǵynúıqurylysjınaqbankinde» teńgelik júıede saqtaǵan salymshylardyń jaǵdaıy qandaı bolmaq jáne naryqta jáne «Qoljetimdi baspana» arqyly páterlerdiń quny ózgeriske ushyraı ma?» degen saýalǵa E. Dosaev páter baǵasyna qaraı ózgerister bolýy múmkin ekenin jetkizdi. «Biraq, baspana baǵasy kóp ózgermeıdi dep paıymdap otyrmyz. Óıtkeni, osy jyly ótken jyldarmen salystyrǵanda ınflıatsııaǵa qarap, baǵanyń kóp óspegenin baıqap otyrmyz. Sebebi, búginde salynyp jatqan baspana qurylysyndaǵy jaǵdaı 5-6 jyl burynǵydaı emes. Qazirgi kezde satylyp jatqan kóp páter joq. Soǵan qaraǵanda kóp ózgerister bolmaıdy»,-dedi mınıstr.
Osy oraıda ol osyǵan deıin de baspana quny turǵysynda naryqtaǵy baǵa AQSh dollaryna aýystyryp baǵamdalǵanyn aıta kele, eleýli ózgerister bolmaıtynyn sóz etti. Sonymen qatar mınıstr «Qoljetimdi baspana» baǵdarlamasy ary qaraı júzege asyrylatyny. Bul baǵytta barlyq úrdister tyńǵylyqty baqylanyp, qajet bolǵan jaǵdaıda Úkimet tıisti sharalardy qabyldaıdy», dedi E. Dosaev.
Teńgeniń baǵamy búgin ǵana ózgerýine baılanysty Turǵynúıqurylysjınaqta teńgelik júıede saqtalǵan jınaq boıynsha túbegeıli ózgerister ázirge joq ekenin atap ótti. «Alaıda biz «Qoljetimdi baspana» baǵdarlamasyn júzege asyrý barysynda ózimizdiń qadamdarymyzdy jaqyn arada aıqyndaımyz»,-túıdi ol.
