Teńge baǵamy qandaı bolady - KASE boljamy
ALMATY. QazAqparat - KASE Qazaqstan qor bırjasy tóraǵasynyń orynbasary Andreı Tsalıýk teńgeniń dollarǵa shaqqandaǵy baǵamy týraly boljamymen bólisti, dep habarlaıdy QazAqparat tilshisi.
«Dollar ósip bara jatyr dep aıtýǵa bolmaıdy. Bizde rekordty kórsetkish 1 dollar quny 384 teńge boldy. Qazir kórsetkish odan tómen. Barlyǵy eksporttaýshylar tapqan tabysyn qashan satady dep kútip otyr. Sońǵy úsh aıda belgili sarapshylardan suradym. Men bir nársege tań qaldym. Olardyń eshqaısysy dollardyń 407-410 degen baǵamyn kórip turǵan joq», - dedi Andreı Tsalıýk.
Onyń aıtýynsha, kóktem ýaqytynda dollar baǵamy túsýi múmkin. Odan keıingi baǵam AQSh pen Reseı arasyndaǵy ekonomıkalyq qatynasqa baılanysty bolady.
«Qazir saýda soǵystaryna baılanysty jaqsy jańalyqtar bar. AQSh Qytaımen kelise bastady. Qazir sarapshylardyń kópshiligi bul oqıǵadan soń jaqsy jańalyq kútip otyr. AQSh Federaldy rezerv júıesi damýshy elderdiń naryǵyna baılanysty óz stavkalaryn osy qarqynmen jalǵastyrmaıtyn bolady. Bul óz kezeginde teńge baǵamy turaqty bolyp qalady degen úmittemiz», - dedi KASE basqarma tóraǵasynyń orynbasary.
