Teńge baǵamy ınterventsııa arqyly nyǵaıyp jatyr ma – Ulttyq bank jaýap berdi

ASTANA QazAqparat – Ulttyq bank tóraǵasy Ǵalymjan Pirmatov teńge baǵamyn nyǵaıtý úshin jasyryn ınterventsııa jasalyp jatqany týraly paıymdardy teriske shyǵardy, dep habarlaıdy QazAqparat tilshisi.

«Keıbir sarapshylar aıtyp júrgendeı, teńge baǵamy ınterventsııa arqyly nyǵaıtylyp jatyr ma?», - dep surady BAQ ókili.

Ǵalymjan Pirmatov Ulttyq bank valıýta saıasatyn barynsha ashyq júrgizip otyrǵanyn basa aıtty.

«Biz byltyrdan bastap Ulttyq banktiń valıýta naryǵyndaǵy búkil operatsııalaryn transparentti túrde ashyp aıtyp kelemiz. Teńge baǵamy tek naryqtaǵy suranys pen usynys bazasynda ǵana qalyptasyp jatyr. Biz Ulttyq qordan qansha aqsha satqanymyzdy, Ulttyq bankke qarasty qorlardyń bárinde qandaı valıýta opertsııasyn jasaǵanymyzdy ashyq aıtyp otyrmyz. Onyń ishindegi eń úlkeni – zeınetaqy qory. Ol qor arqyly biz jyldyń basynda-aq bıyl 2 mlrd dollar satyp alatynymyzdy málimdegenbiz. Ony 12 aıǵa teńdeı bólip, kún saıyn isteımiz. Bul teńgeniń dollarǵa degen baǵamyna barynsha yqpal etpeý úshin jasalady», - dedi ol.

Ulttyq bank basshysy bıyl kvazımemlekettik sektordyń valıýtadaǵy tabysyn satýyna qoıylatyn talaptardy jeńildettilgenin eske saldy.

«Byltyr tabysynyń 75 paıyzyn satýy kerek bolsa, bıyl 50 paıyz tabysyn satady. Sondyqtan eshqandaı jasyryn nemese jasyryn emes ınterventsııa jasaǵan joqpyz. Bul bizdiń múddemizge jat», - dedi Ulttyq bank tóraǵasy.

Aıta keteıik, Ulttyq banktiń aqsha-kredıt saıasaty komıteti bazalyq mólsherlemeni 16,75% deńgeıinde qaldyrý jóninde sheshim qabyldady.