Teńge baǵamy edáýir álsiremeıdi - sarapshy
ASTANA. QazAqparat - FOREX CLUB KT sarapshysy Valerıı Polhovskııdiń pikirinshe, munaı baǵasy tómendeý shegine jetkendikten, aldaǵy ýaqytta teńgeniń edáýir quldyraýy da bolmaıdy.
«Teńge dınamıkasy Reseı rýbli arqyly munaı baǵasymen tyǵyz baılanysta. Bıylǵy jyly bul ózara baılanys erekshe baıqaldy. Bul jyldyq maksımým men mınımýmǵa teńge men munaı qatar qol jetkizgeninen-aq kórýge bolady. Munaı baǵasy quldyraý shegine jetti, sondyqtan aldaǵy ýaqytta teńge baǵamy edáýir álsiremeıdi dep oılaımyn. Iá, AQSh pen Lıvııada óndirý kólemi ósti. Bıylǵy jyly olar jalpy alǵanda táýligine 1 mıllıon barrelge jýyq qosymsha munaı óndirýi múmkin. Alaıda, OPEK táýligine 1,8 mıllıon barreldi naryqtan shyǵardy, oǵan qosa álemdik suranys táýligine 1,2-1,5 mıllıon barrelge artady. Nátıjesinde bıylǵy jyly taza suranys (suranys pen usynys arasyndaǵy aıyrmashylyq) táýligine shamamen 3 mıllıon barrelge tómendeıdi. Álemdegi munaı qory 65 mıllıon barrelge deıin azaıdy. Ol tek AQSh-ta ǵana ósip, al jalpy álem boıynsha quldyrap jatyr.
Naryq emotsıonaldy formadan tıimdilikke qaıtyp oralǵanda ǵana, baǵa burynǵy qalpyna, ıaǵnı, barreline 50 dollarǵa qaıtyp keledi. Osyǵan sáıkes, ulttyq valıýta 1 dollarǵa 315 teńge shamasynda turaqtaýy múmkin. Endigi másele munyń qanshalyqty tez bolatyndyǵynda. Biz jaqyn arada óndiristi qysqartý boıynsha OPEK-tiń sheshimi tıimdi bolǵanyna kóz jetkizemiz dep oılaımyn. Bul kúzge qaraı bolatyn shyǵar», - dep túıdi Polhovskıı.
Keıbir sarapshylar munaı baǵasynyń quldyraýyna alyp-satarlar kináli dep esepteıdi. Bul pikirmen LÝKOIL basshysy Vagıt Alekperov te kelisedi, dep habarlaıdy reseılik BAQ.
«Biz barlyǵymyz, sonyń ishinde sarapshylar men uıymdar da bul máselege alyp-satarlardyń qatysy bar dep esepteımiz. Munaı naryǵy ósip keledi. Biz búgin Eýropanyń munaı ónimderi naryǵyndaǵy satylymdy arttyrdyq. Amerıka naryǵy ósip keledi. OPEK málimeti boıynsha, munaı qory azaıdy. Bul kezdeısoqtyq emes. Búgingi baǵanyń quldyraýyna alyp-satarlardyń qatysy bar», - dedi Alekperov.
Sarapshylardyń pikirinshe, sońǵy eki aıdaǵy OPEK-ke múshe elder men Latyn Amerıkasy elderindegi óndiristiń artýy munaı baǵasynyń kúrt quldyraýyna yqpal etti.
Aıta keteıik, mamyr aıynyń sońynda OPEK-ke múshe elder munaı óndirisin qysqartýdy 2018 jyldyń naýryz aıyna deıin uzartqan bolatyn.
