Teńge baǵamy birneshe aıdan beri turaqty - G. Marchenko
ALMATY. 6 naýryz. QazAqparat - Teńge baǵamynda kópten beri ózgeris bolǵan joq. Bul jaıly QR Ulttyq bankiniń tóraǵasy Grıgorıı Marchenko búgin Almatyda qarjy naryǵyndaǵy ahýal týraly ótkizgen baspasóz máslıhatynda aıtty.
«Birneshe aıdan beri teńge baǵamy 150,50 teńge kóleminde boldy. Aýytqý 30 tıyn kóleminde ǵana. Aqpanda aıtarlyqtaı ózgeris bolǵan joq. Nyǵaıý kezinde belgili bir somany satyp aldyq, sosyn ol qaıta qalpyna keldi», - deıdi G.Marchenko.
Onyń aıtýynsha, aqpanda teńgeniń AQSh dollaryna qatysty baǵamy 150,23-150,88 teńge aralyǵynda ózgerdi. Aıdyń sońynda teńgeniń bırjalyq baǵamy 1 dollar úshin 150,37 teńge boldy. Qazaqstan qor bırjasyndaǵy bırjalyq operatsııalardyń kólemi qosymysha saýda-sattyqtardaǵy mámilelerdi qosa alǵanda qańtarmen salystyrǵanda 28,3 paıyzǵa ulǵaıyp, 4,2 mlrd. dollardy qurady. Bırjadan tys valıýta naryǵyndaǵy operatsııalardyń kólemi 1,7 paıyzǵa tómendep 1,7 mlrd. dollar boldy. Al jalpy alǵanda ishki valıýta naryǵyndaǵy operatsııalardyń kólemi 16,2 paıyzǵa ulǵaıyp 5,8 mlrd. dollardy qurady.
