Teńge baǵamy 340-tan aspaıdy - mınıstr Súleımenov
ASTANA. QazAqparat - Úkimet AQSh-tyń Reseıge qatysty sanktsııalarynyń Qazaqstan ekonomıkasyna qanshalyqty áser etetinin saraptap shyqty. Osyǵan oraı, rýbl baǵamynyń ózgerýi boıynsha birneshe stsenarıı ázirlendi, dep xabarlaıdy QazAqparat tilshisi.
QR Ulttyq ekonomıka mınıstri Tımýr Súleımenovtiń aıtýynsha, rýbl baǵamynyń úsh mejege - 70, 80 jáne 90 deıin baratyn úsh túrli stsenarıı qarastyrylyp otyr. Sonyń saldarynan teńgeniń qalaısha ózgeretini de pysyqtaldy. «Biz makroekonomıkalyq saraptamany da ótkizdik. Bul degenimiz, Qazaqstannyń ishki jalpy óniminiń ósýi qalaı ózgeredi, sol jaǵy zerdelendi. Onyń syrtynda ınflıatsııa, jumyssyzdyqtyń deńgeıi jáne bıýdjettiń kórsetkishteri de qaraldy. Sanktsııadan kim jáne qandaı kásiporyndar zardap shegýi múmkin? Ony da qarystyryp shyqtyq. Osyǵan baılanysty Úkimettiń birlesken is-qımyl jospary ázirlendi. Úsh stsenarııdiń bireýi iske asyp jatsa, tıisti sharalar qolǵa alynady», - dedi T.Súleımenov jýrnalısterge bergen suxbatynda.
Mınıstrdiń aıtýynsha, ázirshe rýbldiń baǵamy 61-62-niń aınalasynda bolyp tur. Oǵan munaıdyń baǵasy da oń áser etip otyr. «Sondyqtan jaqyn arada qandaı da bir úlken ózgerister bolady dep aıta almaımyz. Negizi, rýbl baǵamynyń ózgerýin tikeleı teńgemen baılanystyrýǵa bolmaıdy. Sebebi bizdiń ekonomıkamyz bólek. AQSh-tyń sanktsııalary bizge taramaıdy. Sondyqtan onyń tikeleı áseri joq. Pessımıstik stsenarıı bolǵan kúnniń ózinde ishki jalpy ónimniń ósýi saqtalady. Erteń, biz Parlamenttiń jalpy otyrysynda áleýmettik-ekonomıkalyq damý boljamyn tanystyramyz. Onda teńgeniń shekti baǵamy 340 dep kórsetilgen. Demek, Úkimet teńge baǵamynyń odan ary óspeıtinine senimdi», - dep atap kórsetti T.Súleımenov.
