Teńge baǵamy 1,5 paıyzǵa ósti - Ulttyq bank
ASTANA. QazAqparat - Sáýirdiń sońynda Qazaqstanda ulttyq valıýtanyń baǵamy 1 AQSh dollar úshin 327,25 teńgeni qurap, 2017 jylǵy jeltoqsannyń aıaǵynan beri 1,5 paıyzǵa nyǵaıdy, dep habarlaıdy QazAqparat tilshisi.
Úkimet otyrysynda baıandama jasaǵan QR Ulttyq banki tóraǵasynyń orynbasary Oleg Smolıakov 2018 jyldyń qańtar-sáýirinde valıýta naryǵyndaǵy jaǵdaı turaqty bolǵanyn sóz etti. Ulttyq valıýta baǵamyn qalyptastyratyn irgeli faktorlar qolaıly túrde yqpal etti.
Onyń atap ótýinshe, bıylǵy tórt aıda 1 AQSh dollary úshin baǵam 318,3 - 333,3 teńge mólsherinde ózgerip, jyl basynan beri 1,5 paıyzǵa nyǵaıdy. Osy oraıda sáýirdiń aıaǵyna qaraı bir dollar úshin 327,25 teńge mólsherinde teńeldi.
«Ulttyq banktiń altyn-valıýta rezervi naýryzdyń sońynda 30,6 mlrd AQSh dollaryn qurap, jyl basynan beri 0,3 paıyzǵa tómendedi. Shetel vaıýtasyndaǵy Ulttyq qordyń aktıvteri naýryzdyń aıaǵynda 59,3 mlrd AQSh dollaryna baǵalanyp otyr. Jalpy halyqaralyq rezervter 89,9 mlrd AQSh dollaryna jetip, jyl basynan beri 1 paıyzǵa ósti», - dedi Oleg Smolıakov.
