Teńge baǵamynyń álsireýine qatysty alǵysharttardy kórip turǵan joqpyz – vıtse-mınıstr
ASTANA. KAZINFORM – QR Ulttyq ekonomıka vıtse-mınıstri Arman Qasenov teńge baǵamyna áser etetin jaǵdaılardy atady.
- Valıýta baǵamy únemi irgeli faktorlarǵa, eń aldymen, tólem balansyna táýeldi. Qazaqstannyń eksporttyq pozıtsııalary joǵary baǵada bolsa, eksportymyz ósip, teńge nyǵaıýy múmkin. Valıýta baǵamyna taǵy ne áser etedi? Bul rette ınflıatsııa, ekonomıkadaǵy paıyzdyq mólsherlemeler deńgeıiniń yqpaly bar. Al irgeli faktorlar turǵysynan biz devalvatsııaǵa qatysty eshbir negizdi kórip turǵanymyz joq. Qazirgi baǵamnyń deńgeıi túbegeıli negizdelgen dep esepteımiz. Mysaly, bir aptada nemese bir aıdan keıin munaı quny 10 dollarǵa qymbattaýy nemese 10 dollarǵa arzan bolýy múmkin. Bul turǵyda baǵamǵa yqpal etedi, - dedi Arman Qasenov Senattyń jalpy otyrysynan keıin tilshiler suraǵyna jaýap bere otyryp.
Onyń aıtýynsha, munaı baǵasy men teńge, rýbl sııaqty valıýtalardyń aıyrbas baǵamy arasynda baılanys bar, tipti kanadalyq dollar da munaı baǵasyna táýeldi. Bul óz kezeginde qalypty jaǵdaı. Іrgeli faktorlar ózgergen jaǵdaıda, baǵamǵa áser etýi kerek.
- Degenmen, munaı baǵasynyń qazirgi deńgeıinde baǵamynyń álsireýi úshin eshqandaı alǵysharttardy kórip turǵan joqpyz, - dedi vıtse-mınıstr.
Eske salsaq, taıaýda Qazaqstan qor bırjasyndaǵy (KASE) saýda-sattyq qorytyndysy boıynsha, 1 dollardyń teńgege shaqqandaǵy baǵamy tómendedi.
13 aqpanda Astana men Almaty qalalaryndaǵy aqsha aıyrbastaý pýnktterinde dollar 502 – 509 teńgeden saýdalanyp jatyr.