Teńge baǵamynyń 400 teńgege deıin nyǵaıýy múmkin be – Súleımenov paıymy
ASTANA. KAZINFORM – Ulttyq bank tóraǵasy Tımýr Súleımenov ulttyq valıýta baǵamynyń dollarǵa qatysty 400 teńgege deıin nyǵaıý yqtımaldyǵyna qatysty pikir bildirdi.
- Bári de múmkin. Degenmen, shyndyqqa negizdelgen stsenarııdi qarastyrǵan jón jáne ol stsenarııde 400 teńgeni qarastyrmaımyz. Bir dollar 400 teńge deıinde qalyptasatyndaı ekonomıkada da, ónerkásipte de eksportty sonshalyqty arttyryp, ımportty sonshalyqty qysqarta almaıtyn shyǵarmyz. Sondyqtan bizdiń boljamdy stsenarıımizde 400 teńge degen jospar joq, - dedi Tımýr Súleımenov Ulttyq bankte ótken brıfıng barysynda BAQ ókilderiniń saýalyna oraı.
Ol ulttyq valıýtanyń qubylmalylyǵy 5–7 paıyzdan joǵary bolmaıtyndyǵyn aıtady. Ulttyq banktiń resmı derekterine sáıkes, 6 naýryzdaǵy jaǵdaı boıynsha dollar baǵamy 493,36 teńge boldy.
— Jalpy, baǵamnyń kez kelgen baǵytta kúrt ózgerýin kórip otyrǵan joqpyz. Barlyǵy naryqtaǵy suranys pen usynystyń tepe-teńdigine baılanysty qalyptasady. Kúrt alypsatarlyq qozǵalystardy toqtatamyz, qajet bolǵan jaǵdaıda ınterventsııa qoldanamyz, — dep atap ótti Tımýr Súleımenov.
Esterińizge sala ketsek, Ulttyq bankiniń Aqsha-kredıt saıasaty komıteti bazalyq mólsherlemeni +/- 1 p. t. dálizimen jyldyq 18% deńgeıinde belgileý týraly sheshim qabyldady.
Degenmen komıtet bazalyq mólsherlemeni jyldyń ekinshi jartysynda tómendetý múmkindigin qarastyrmaq.
