Teńge baǵamynda jasandy qysym joq – Ulttyq bank

ASTANA. KAZINFORM — Qazan aıynan bastap teńgeniń dollarǵa shaqqandaǵy aıyrbastaý baǵamy 499-500 teńge deńgeıine deıin (9%-ǵa) turaqty nyǵaıǵany baıqalyp otyr. Bul týraly Alttyq bank habarlady. 

Ulttyq valıýtanyń nyǵaıýy qolaıly syrtqy jaǵdaılardyń jáne dáıekti makroekonomıkalyq saıasat pen ınvestorlar tarapynan jaqsarǵan kútýlerdiń úılesim tapqanyn kórsetedi.

— Munaıdyń álemdik baǵasy barreline 60 AQSh dollarynan joǵary deńgeıde turaqty saqtalyp tur. Sonymen qatar AQSh Federaldy rezerv júıesiniń mólsherlemeni tómendetý tsıkli jahandyq dollar ındeksiniń 8,3%-ǵa álsireýine jáne jyl basynan beri damýshy naryqtardaǵy valıýtalar ındeksiniń 8,3%-ǵa nyǵaıýyna yqpal etti. Osy jaǵdaılardyń aıasynda damýshy elderdiń aktıvterine, sonyń ishinde Qazaqstan naryǵyna degen halyqaralyq ınvestorlardyń qyzyǵýshylyǵy joǵary deńgeıde saqtalyp otyr, — delingen habarlamada.

Inflıatsııalyq qysymdy tómendetýge jáne makroekonomıkalyq ortanyń boljamdy bolýyn eseleýge baǵyttalǵan Úkimet pen Ulttyq Banktiń úılesimdi saıasaty teńgeniń nyǵaıýyna aıtarlyqtaı úles qosty.

— Atap aıtqanda, Úkimet, Ulttyq bank jáne agenttik 2026–2028 jyldarǵa arnalǵan makroekonomıkany turaqtandyrý jáne halyqtyń ál-aýqatyn arttyrý jónindegi Birlesken is-qımyl baǵdarlamasyn iske asyryp otyr. Atalǵan baǵdarlama suranys pen usynys arasyndaǵy teńgerimsizdikti joıýǵa, bıýdjet shyǵystarynyń tıimdiligin arttyrýǵa, mıkro- jáne makroprýdentsıaldy retteý sharalaryn iske asyrýǵa, halyqtyń naqty tabysyn ósirýge jáne ınflıatsııany tómendetý men turaqtandyrý arqyly ornyqty ekonomıkalyq ósimge jaǵdaı jasaýǵa baǵyttalǵan, — delingen Ulttyq bank habarlamasynda.

Ulttyq banktiń dáıekti sheshimderi naryqqa qatysýshylardyń senimin kúsheıtti. Qalypty qatań aqsha-kredıt saıasaty ınflıatsııalyq kútýlerdiń qaıta qaralýyna jáne teńgedegi quraldardyń naqty kiristiligin arttyrýǵa sebep boldy. Bul óz kezeginde olardyń tartymdylyǵyn, sonyń ishinde beırezıdentter úshin edáýir kúsheıtti.

— Qazan aıynyń basynan qarasha aıynyń sońyna deıingi kezeńde beırezıdentterdiń Memlekettik baǵaly qaǵazdaryna (MBQ) salǵan portfeldik ınvestıtsııalary 1,1 mlrd AQSh dollaryna ulǵaıyp, tarıhı maksımým sanalatyn 3,6 mlrd AQSh dollaryna jetti. Jyl basynan beri ósim 1,5 mlrd AQSh dollar boldy.

Bul, óz kezeginde, qısyqtyń uzyn bóliginde Qarjy mınıstrliginiń qaryz alý qunyn 1 paıyzdyq tarmaqtan asa tómendetýge yqpal etti: jeltoqsan aıynda 9 jyldyq MBQ 16,1%-ben ornalastyryldy (qazanda — 17,2%), — delingen habarlamada.

Sheteldik ınvestorlar tarapynan shetel valıýtasynyń óspeli usynysy teńgeniń nyǵaıýyna tikeleı faktor boldy. Syrtqy qolaıly ahýal da qosymsha qoldaý kórsetti.

Memlekettik baǵaly qaǵazdar naryǵynyń ınfraqurylymyn damytý boıynsha Ulttyq banktiń júıeli jumysy — operatsııalardyń ashyqtyǵyn arttyrý, kiristilik qısyǵyn qalyptastyrý, beırezıdentter úshin qoljetimdilik pen esep aıyrysý rásimderin jetildirý — naryqtyń sapaly negizin qalyptastyryp, sheteldik ınvestorlardyń qyzyǵýshylyǵyn qoldap otyr.

Sonymen qatar, ulttyq valıýtanyń nyǵaıýy ınflıatsııany turaqtandyrýda mańyzdy faktor sanalady. Tutyný sebetinde ımport úlesin eskere otyryp, teńgeniń nyǵaıýy syrtqy baǵa qysymynyń ishki baǵalarǵa berilýin shekteıdi.

Osylaısha, aıyrbastaý baǵamynyń qazirgi dınamıkasy ekonomıkalyq saıasattyń sapasy jaqsarǵanyn jáne meıilinshe boljamdy makroorta qalyptasqanyn kórsetedi (aqsha-kredıt jáne salyq-bıýdjet saıasatynyń úılestirilýi), sonyń nátıjesinde jahandyq ınvestorlar Qazaqstandy oń baǵalap, elge portfeldik ınvestıtsııalardyń kelýine jol ashty.

— Ulttyq banktiń birizdi ári qalypty qatań aqsha-kredıt saıasaty baǵa turaqtylyǵyn qamtamasyz etýge berilgen mańyzdy sıgnal sanalady. Bul óz kezeginde ınvestorlardyń teńgemen baǵalanatyn quraldarǵa senimin kúsheıtedi. Ulttyq bank erkin ózgermeli aıyrbas baǵamy rejımin saqtaıdy jáne teńge baǵamynyń ekijaqty qısyndy qubylmalylyǵyna jol beredi. Valıýta naryǵyndaǵy jaǵdaı turaqty baqylaýda. Qazirgi ýaqytta Ulttyq bank alypsatarlyqqa qatysty belsendilikti jáne oǵan aralasýǵa ıtermeleıtin qandaı da bir faktorlardy baıqap otyrǵan joq, — delingen habarlamada.

Aıta ketelik Ulttyq bank óz tájirıbesinde alǵash ret halyqaralyq deńgeıdegi mádenı sharalardyń eldegi ekonomıkaǵa áserin baǵalady. Osy baǵalaýǵa súıensek, Djennıfer Lopes pen Backstreet Boys kontsertteri Astana men Almatydaǵy meıramhana, dámhanalardyń saýdasyn 11 paıyzǵa deıin arttyrǵan.