Teńge baǵamy damyǵan elderdiń valıýtasy deńgeıinde qubylyp turdy - Ulttyq bank

ASTANA. KAZINFORM – QR Ulttyq banki tóraǵasynyń orynbasary Álııa Moldabekova teńge baǵamynyń qubylmalylyǵyna qatysty taldaý derekterin usyndy.

Onyń aıtýynsha, teńge baǵamynyń qubylmalylyǵy deńgeıi damyǵan elderdiń valıýtalarymen shamalas. 2025 jyly ortasha eseppen Qazaqstannyń ulttyq valıýtasynyń qubylýy 7,5 paıyzdy qurady. Sonymen qatar, eýro baǵamynyń qubylmalylyǵy 7,2 paıyzdy, al fýnttyń qubylmalylyǵy 7,8 paıyz shamasynda boldy.

— Bul turǵyda teńge baǵamy damyǵan elderdiń valıýtalary sııaqty ózgerip turǵanyn baıqaýǵa bolady. Mysaly, Meksıka men Brazılııa sııaqty elderdiń valıýtalary 10-11 paıyz deńgeıinde qubyldy. Árıne, Reseı rýbliniń baǵamy eń kóp ózgergen valıýta bolǵany da túsinikti jaǵdaı. Kórshi elde byltyr baǵamnyń qubylmalylyǵy 19 paıyz bolsa, al jyl basynan beri shamamen 12 paıyzǵa jetti. Osy salystyrmaly taldaý negizinde teńgemiz basqa valıýtalardyń kóbisine qaraǵanda turaqty, dedi Álııa Moldabekova elordada ótken baspasóz máslıhatynda.

Esterińizge sala ketsek, Ulttyq bankiniń Aqsha-kredıt saıasaty komıteti bazalyq mólsherlemeni +/- 1 p. t. dálizimen jyldyq 18% deńgeıinde belgileý týraly sheshim qabyldady.