Tenerıfe jaǵalaýynda ýly teńiz organızmderi anyqtaldy

ASTANA. KAZINFORM — Tenerıfe aralynyń soltústik jaǵalaýynda portýgaldyq «kemesheler» dep atalatyn ýly teńiz organızmderi tirkeldi, dep habarlaıdy BILD

Uzyn qarmalaýyshtary bar bul jándikter qatty kúıik týdyrýy múmkin.

Bılik birqatar jaǵajaıdy shuǵyl túrde jaýyp, demalýshylarǵa qaýip týraly eskertý jasady.

Araldyń soltústigindegi Garachıko mýnıtsıpalıteti óz akvatorııasynda qaýipti organızmderdiń tabylǵanyn habarlap, ýaqytsha sýǵa túspeýge keńes berdi.

Sondaı-aq Santa-Krýs-de-Tenerıfe qalasyndaǵy tanymal jaǵajaı da baqylaýǵa alynǵan.

Álsiz aǵys saldarynan bul organızmder jaǵalaýǵa jaqyn jerde uzaq ýaqyt turaqtap qalýy múmkin.

Jergilikti BAQ málimetinshe, osyndaı «kemeshelerdiń» birimen janasqan bir adam qatty aýyrsyný saldarynan aýrýhanaǵa jetkizilgen.

Bılik ókilderi qaýipti teńiz organızmderi jaǵalaý aımaǵynan ketkennen keıin jaǵajaılar qaıta ashylatynyn málimdedi. 

Aıta ketelik Mańǵystaýlyq ekologter aqqýlardyń ólimine qatysty zertteý nátıjesin jarııalady.