Tenderlerge máslıhat depýtattarynyń qatysýy zańmen shektelýi múmkin
ASTANA. KAZINFORM — Májilis depýtaty Baqytjan Bazarbek máslıhat depýtattaryn memlekettik satyp alýǵa jáne tenderlerge qatystyrýdy shekteý máselesine qatysty pikir bildirdi.
Májilis kýlýarynda depýtat qazirgi ýaqytta memlekettik satyp alýlarǵa qatysatyn keıbir kompanııalardyń zańdy ókilderi nemese quryltaıshylary arasynda máslıhat depýtattary kezdesetin jaǵdaılar bar ekenin atap ótti.
— Muny qalaı túsinýge bolady? Kóptegen joba kóp jaǵdaıda jergilikti bıýdjetten qarjylandyrylady. Balabaqsha, mektep salýdan bastap, jol qurylysyn júrgizýge deıingi jobalardyń aktsıoneri, quryltaıshylary sol óńirdiń máslıhat depýtaty bolýy múmkin. Iá, ol bar. Ondaı jaǵdaı bolyp otyr. Sondyqtan biz múddeler qaqtyǵysyn joqqa shyǵarýymyz kerek. Zańǵa tıisti ózgertýlerdi engizemiz, — dedi Baqytjan Bazarbek.
Onyń aıtýynsha, qazirgi ýaqytta Májiliste sybaılas jemqorlyqqa qarsy jańa zań jobasy ázirlenip jatyr. Sonymen qatar usynylyp otyrǵan zańnamalyq túzetýler múddeler qaqtyǵysy anyqtalǵan jaǵdaıda memlekettik satyp alý nátıjelerin joıý tetigin qarastyrady.
— Memlekettik satyp alý barysynda nemese múddeler qaqtyǵysy bolyp jatsa, kásiporyn jeńimpaz atansa da, jańa túzetýler boıynsha barlyq shyǵarylǵan sheshim joıylady. Basqasha aıtqanda, biz bastapqy jaǵdaıǵa qaıtadan keltiremiz, ıaǵnı, muny men áleýmettik ádilettilik dep esepteımin, — dedi depýtat.
Buǵan deıin memlekettik satyp alýda alaıaqtyq shemalarǵa qalaı tosqaýyl qoıylatynyn jazǵanbyz.
