Tenderdiń barlyǵy der ýaqytynda ótpeıdi deý jańsaq pikir - Esep komıteti
ASTANA. QazAqparat - Tenderdiń barlyǵy der ýaqytynda ótpeıdi deý jańsaq pikir. Bul týraly búgin QR Prezıdenti janyndaǵy Ortalyq kommýnıkatsııalar qyzmetindegi brıfıngte Respýblıkalyq bıýdjettiń atqarylýy jónindegi esep komıtetiniń tóraǵasy Qozy-Kórpesh Jańbyrshın málim etti.
«Meniń oıymsha, tenderdiń barlyǵy óz ýaqytymen ótkizilmeıdi deýge bolmaıtyn shyǵar. Tenderlerdiń kópshiligi óziniń josparlanǵan merziminde ótkiziledi. Biraq, kesh ótkiziletin tenderler de bar», - dedi ol.
Komıtet basshysynyń aıtýynsha, keıbir tenderlerdiń qorytyndysyn sot arqyly joıylýy da kezdesedi.
«Jergilikti organdardyń qyzmetine jasaǵan taldaýymyzda kózimizge túsken kemshilikterdiń biri - tender ótkizý ýaqytynyń ózgertilýi. Onyń sebebi birinshiden, tıisti qujattamalar ýaqytynda daıyndalmaıdy. Máselen, ınvestıtsııalyq joba jasaý úshin tender ótkizý ýaqyty belgilengen. Biraq onyń tehnıkalyq-ekonomıkalyq negizdemesi nemese jobalaý-smetalyq qujattamalary joq. Taǵy da tıisti qujattamalary daıyn bolmaıdy. Soǵan baılanysty tenderdiń ýaqyty keıinge, basqa ýaqytqa shegeriledi», - dedi Q.Jańbyrshın.
Onyń atap ótýinshe, osy aralyqta jobanyń quny kóterilip ketedi. «Biraq, tenderdiń barlyǵy ýaqytynda ótkizilmeıdi dep aıtý, menińshe, qate», - dedi ol.
