Tenderdik komıssııalarǵa birinshi basshylardyń ózderi jetekshilik etýi kerek - Elbasy
«Bıýdjettiń oryndalmaýyndaǵy basty sebep, memlekettik satyp alýlardyń ekonomıkaǵa tıimsiz áserinen bolyp otyrǵandyǵy týraly jıi estip júrmin. Syrttan bóten jetkizýshiler kirip ketpeýi úshin tender ótkizetin memlekettik organdar taýarlardyń jetkizilýine qatysty aqylǵa qonbaıtyn merzimderdi qoıatyny, sosyn ózderiniń «jeńimpazdaryna» kelgende álgi merzimniń ýaqytyn keıin shegerip jasaıtyny qupııa bolýdan da qaldy. Álde buny bilmeısińder me? Tenderdi bir kózden júzege asyrý úshin úderisti ádeıi «búldiretinder» de bar. Muny kópshiligiń bilip, soǵan jol berip otyrsyńdar. Memlekettik organdardyń birinshi basshylary budan shettetilgen bolyp, barlyǵyn syrttan rettep otyrady», - dedi N. Nazarbaev.
Osyǵan oraı Memleket basshysy Úkimetke osy máseleni qarap túbegeıli zertteýdi tapsyrdy. «Ákimder men ortalyq memlekettik organ basshylary tenderlik komıssııaǵa ózderi jetekshilik etýleri jáne sol boıynsha bar jaýapkershilikti ózderi alýlary kerek. Óıtkeni, munda qomaqty memleket qarajaty jumsalyp jatyr. Birinshi basshylardyń ózderi jetekshilik jasasyn komıssııaǵa», - dedi Elbasy jıyn barysynda.
Sonymen qatar, Elbasy memlekettik satyp alýlar týraly zań jobasy ázirlenip jatqanyn eske salyp, muny jedeldetýdi tapsyrdy. «Bir tıpti taýarlarmen bolatyn konkýrstar, aýktsıondar ortalyqtanýy kerek. Bul zań sony sheshe me? Birden bir uıymdastyrýshyǵa memlekettik organdardyń satyp alýlary boıynsha shtattardy, mamandardy berý qajet. Osyǵan uqsas qurylymdardy jergilikti jerde qurý kerek», - dedi N. Nazarbaev.