Temza ózeniniń alǵash ret ańqasy keýip, arnasy qańsyp qaldy
NUR-SULTAN. QazAqparat - Brıtanııadaǵy Temza ózeniniń bas jaǵy aptap ystyqtan tartylyp qaldy. Ózen arnasy 8 km tómenge deıin keýip qalǵan, dep habarlaıdy The Guardian.com.
Rivers Trust ekologııalyq uıymynyń saıasat jáne ekologııa máseleleri boıynsha jetekshisi doktor Rob Kollınz Temza ózeniniń arnasy Glostershır graftyǵynda keýip, qańsyp jatqanyn, endi ózenniń áýelgi bastaýynan tómenge qaraı 5 mıl (8 km) jerden bastap qana bolymshy sýdyń «jylap aǵyp» jatqanyn aıtady.
Temza — Brıtanııanyń ońtústik bóligindegi ózen, uzyndyǵy 330 kılometr.
Shilde aıynda bul elde aptap ystyq boldy. Buǵan deıin Brıtanııada tirkelgen eń joǵary temperatýra 38,7 gradýs bolsa, bıylǵy jazda rekord buzylyp, ystyq 40,3 gradýsqa jetken.
Brıtanııada 1935 jyldan beri shildede qýańshylyq bolyp keledi. Sýmen qamtıtyn birneshe kompanııa sýdy paıdalanýǵa shekteý engizgen.
Frantsııa men Ispanııada da kún shyjyp tur. Belen-Bele qalasynda aýa temperatýrasy 39,6 gradýsqa jetken. Týlýza (ońtústikte) men Lıonda (ońtústik-shyǵysta) 38° C, Strasbýrgte (shyǵysta) 36° C, Parıjde 35° C ystyq bop tur.
Ispanııanyń sınoptıkteri eldiń shyǵys jáne ońtústik bóligindegi birneshe aýdanda túnniń ózinde aýa temperatýrasy 20 gradýstan túspeı turǵanyn aıtady. Oǵan ádettegiden Jerorta teńiziniń sýy 3-4°C jyly bolyp turǵany sebep bolýy múmkin dep sanaıdy.
