Temu, Valve, Apple – Qazaqstan bıýdjetine eń kóp salyq tólegen sheteldik platformalar belgili boldy

ASTANA. KAZINFORM – Memlekettik kirister komıteti tsıfrlyq aktıvterdi ákimshilendirý basqarmasynyń basshysy Talǵat Ádilov sheteldik ınternet platformalardyń Qazaqstan bıýdjetine qansha salyq tólegenin málim etti.

- Qazaqstanda 116 sheteldik kompanııa platformasyn tirkedi. Onyń 18-i bıyl tirkeýge turdy. Onyń ishinde telebaǵdarlamalar usynatyn Okko kompanııasy da bar. Olar da salyq tóleıdi. Grafıkalyq dızaınmen aınalysatyn Canva kompanııasy da bizge salyq tólep otyr. Bul bıyl tirkelgenderdiń ishindegiler, - dedi basqarma basshysy.

Onyń aıtýynsha, sheteldik ınternet platformalardy salyq tóleýge mindetteıin norma engizilgennen beri bıýdjetke 111 mlrd teńge túsken.

- Onyń ishinde 2025 jyly 41 mlrd teńge tóledi. Іri salyq tóleýshiler retinde 6 mlrd teńge tólegen Temu kompanııasyn atap óte alamyn. Sondaı-aq, Apple men Google 5 mlrd teńgedeı salyq tóledi.

Bıyldyń ózinde kıim satatyn Next sııaqty kompanııalar jaqsy salyq tóleı bastady dep aıtýǵa bolady. Ol 280 mln teńgeden astam salyq tóledi. Quramyna Alibaba.com, 1688, TaoBao saıttary kiretin Alibaba toby 140 mln teńgeden astam salyq tóledi. Olardyń múmkindikterin Temu kompanııasymen salystyrsaq, keleshekte olar da qomaqty salyq tóleıdi dep kútýge bolady, - dedi Talǵat Ádilov.

Degenmen komıtettiń baspasóz qyzmeti Kazinform tilshisine eń kóp salyq tólegen sheteldik platformalardyń alǵashqy úshtiginde Google kompanııasy joq ekenin naqtylap málim etti.

Komıtettiń resmı málimetinshe, 2025 jyldyń basynan beri eń kóp salyq tólegen úsh platforma mynalar:

Temu – 6,2 mlrd teńge;

Valve corporation – 5,3 mlrd teńge;

Apple – 5,2 mlrd teńge.

Eske salsaq, shilde aınyda Eýroodaq Temu-dy tsıfrlyq qyzmetter týraly zańdy buzdy dep aıyptaǵan edi.

Al Ózbekstan 20 naýryzdan bastap óz aýmaǵynda Temu buǵattalatynyn málimdegen.