Temu AQSh-taǵy tabysynyń kúrt tómendegenin habarlady
ASTANA. KAZINFORM - Temu bıýdjettik marketpleısiniń ıesi PDD Holdings sońǵy toqsanda AQSh-taǵy tabysynyń shamamen 40%-ǵa azaıǵanyn málimdedi.
Holdıngtiń resmı esebine sáıkes, Temu-diń 2025 jyldyń birinshi toqsanyndaǵy AQSh-taǵy paıdasy 2,22 mıllıard dollardy qurady. Bul 2024 jyldyń birinshi toqsanymen salystyrǵanda 38%-ǵa tómen. Mamandar mundaı kúrt quldyraýdy Tramp engizgen salyqtarmen baılanystyrady.
Atap aıtqanda, bıylǵy sáýir aıynda AQSh prezıdenti 800 dollardan tómen bolatyn taýarlarǵa salyq salynbaıtyn de minimis zańyn joıdy. Budan keıin Tramp ákimshiligi Qytaıdan keletin ımporttyq taýarlarǵa salynatyn salyqty 145%-ǵa deıin kúrt kóterdi. Buǵan jaýap retinde Temu AQSh aýmaǵynda Qytaıdan tikeleı jetkiziletin taýarlardy satýdan bas tartty. Onyń ornyna, kompanııa endi tek AQSh qoımalarynda ornalasqan taýarlardy ǵana amerıkalyq tutynýshylarǵa usynatynyn málimdedi.
PDD Holdings kompanııasynyń negizin qalaýshylardyń biri ári qosalqy atqarýshy dırektory Lı Chenniń aıtýynsha, Temu tabysynyń kúrt tómendeýine Qytaı ishki naryǵyndaǵy básekelestiktiń kúsheıýi de áser etken.
Aıta keteıik, Temu-diń Qazaqstandaǵy tabysy týraly PDD Holdings eshqandaı esep bermeıdi. Bıylǵy jyldyń basynda «Aq jol» partııasynyń depýtattary bul máselege nazar aýdaryp, sheteldik marketpleısterden qosylǵan qun salyǵyn (QQS) alýdy usyndy. Olar tek 2023 jyly ǵana memleket qazynasyna sheteldik platformalardan QQS túrindegi 60 mlrd teńgeden astam qarajat túspegenin aıtty.
2025 jyldyń aqpan aıynda Temu basqa sheteldik marketpleıstermen birge Qazaqstanda salyqtyq tirkeýden ótti. Degenmen, qazaqstandyqtardyń bul saýda platformasyna qanshalyq tabys ákelip otyrǵany týraly ashyq ári naqty esepter áli kúnge deıin jarııalanǵan joq.