Temirjolshylarǵa alǵashqy jarnasyz 4 paıyzdyq ıpoteka beriledi
ASTANA. KAZINFORM — «Qazaqstan temir joly» ulttyq kompanııasy» aktsıonerlik qoǵamynyń basqarma tóraǵasy Talǵat Aldybergenov «Samuryq-Qazyna» qorynyń qoǵamdyq keńes otyrysynda temirjolshylarǵa arnalǵan ıpoteka ázirlenip jatqanyn aıtty.
— Memleket basshysynyń qoldaýymen temirjolshylar turaqtamaıtyn jáne maman tapshy óńirlerdegi jumysshylardy baspanamen qamtamasyz etý baǵdarlamasy iske qosyldy. Sharttary óte jeńil. Ipotekanyń jyldyq syıaqysy 4 paıyz bolady. Eshqandaı alǵashqy jarna salýdyń qajet joq. Merzimi 16 jylǵa deıin. Birinshi kezeńde 534 otbasyny osy ıpotekamen qamtýdy josparlap otyrmyz. Qoldanysqa beriletin baspana QTJ-nyń óndiris aýmaqtaryna kórshi aýdandarda salyndy. Mektep pen balabaqshada jaıaý baratyn jerde tur, — dedi QTJ basshysy.
Atalǵan baǵdarlama Astana, Qaraǵandy, Pavlodar, Qostanaı, Semeı qalalarynda iske asyrylady.
— Basqa óńirlerdi de pysyqtap jatyrmyz, — dedi Talǵat Aldybergenov.
Buǵan deıin 2030 jylǵa deıin eldiń temirjol ınfraqurylymyn damytýǵa 10 mlrd dollar ınvestıtsııa salynatynyn jazǵan edik. Bul QTJ-nyń qazirgi jalpy qaryzymen shamalas soma. Sońǵy derekter boıynsha ulttyq temirjol kompanııasynyń jalpy qaryzy 4,7 trln teńgeden asqan.
