Temirjolmen júk tasymalyn arttyrý: 4 iri joba jasalyp jatyr
ASTANA. KAZINFORM – Elimizde jalpy uzyndyǵy 1,3 myń shaqyrymnan asatyn 4 iri temirjol jobasy júzege asyrylyp jatyr. Bul týraly Kazinform agenttiginiń resmı saýalyna Kólik mınıstrligi joldaǵan jaýapta aıtylǵan.
Kólik mınıstri Marat Qarabaev ótken jyldyń basynda júk tasymaldaýǵa Qazaqstan temirjolynyń qýaty jetpeı jatqanyn aıtyp edi. Vedomstvo bul máseleni sheshý úshin qandaı jumystar atqarylyp jatqanyn málimdedi.
— Memleket basshysynyń 2029 jylǵa deıingi tapsyrmasy sheńberinde magıstraldyq temirjoldardyń úzdiksiz tasymalyn qamtamasyz etý jáne qýatyn arttyrý maqsatynda 11 myń km temirjol ýchaskelerine jóndeý júrgizilip jatyr, onyń ishinde búgingi tańda 2,8 myń km astam ýchaskelerge (26%) jóndeý júrgizildi. Sondaı-aq jalpy uzyndyǵy 1,3 myń km asatyn tórt iri temirjol jobasyn (Dostyq-Moıynty ekinshi joldary, Almaty stansasy, Darbaza–Maqtaaral jáne Baqty-Aıagóz aınalma jelisi) salý jumystary jalǵasty. Osy jobalardy iske asyrý Ortalyq Azııa men Qytaıdyń ýchaskeleri men baǵyttarynda taǵy 20 mln tonna qosymsha júk ótkizý qabiletin qamtamasyz etýge múmkindik beredi, - delingen habarlamada.
Vedomstvo málimetinshe, 2024 jyly temirjol arqyly júk tasymaldaý kólemi 303,2 mln tonna boldy, bul - 2023 jylmen (297,3 mln tonna) salystyrǵanda 2%-ǵa nemese 5,9 mln tonnaǵa artyq.
Onyń ishinde respýblıkaishilik tasymaldar – 172,2 mln tonna, eksporttyq tasymaldar – 83,2 mln tonna, tranzıttik tasymaldar – 27,4 mln tonna bolǵan.
Aıta keteıik, buǵan deıin keleshekte temirjol salasynda 27 myń jumys orny paıda bolatyny jaıly jazǵan edik.