Temirjolǵa qysylyp qalǵan kólik saldarynan poıyz 16 mınýtqa kidirdi
ASTANA. KAZINFORM — Jol talǵamaıtyn kólik Medeý — Jetisý aralyǵynda jolaýshylar poıyzynyń ótýine kedergi keltirgen, dep habarlaıdy «Qazaqstan temir joly» UK» AQ baspasóz qyzmeti.

— 12 naýryz saǵat 15:46–da Almaty-2-Pavlodar baǵyty boıynsha kele jatqan jolaýshylar poıyzynyń mashınısi temir jolyna belgilenbegen jerden shyǵyp, relster arasynda qysylyp qalǵan Toyota Land Cruiser markaly avtokóliginiń kesirinen shuǵyl tejeýdi qoldanýǵa májbúr boldy. Ótip bara jatqan temirjolshylar jedel túrde jol talǵamaıtyn kólikti qaýipsiz jerge súırep apardy, sodan keıin júrgizýshi oqıǵa ornynan qashyp ketti. Oqıǵa saldarynan poıyz 16 mınýtqa kidirdi. Oqıǵa týraly polıtsııanyń jelilik basqarmasyna habarlandy, tergeý júrgizilýde, — delingen taratylǵan aqparatta.
2025 jylǵy qańtar-aqpanda temirjol ótkelderinde avtokólik quraldary júrgizýshileriniń jol qozǵalysy erejelerin buzýyna baılanysty 4 jol-kólik oqıǵasy (JKO) tirkeldi. Bul jolaýshylar men temirjol qyzmetkerleriniń qaýipsizdigine qaýip tóndirdi.
Byltyr temirjol ótkelderinde osyndaı 26 JKO boldy. QTJ jol qozǵalysynyń barlyq qatysýshylaryn temirjoldaǵy qaýipsizdik erejelerin qatań saqtaýǵa shaqyrady.
Buǵan deıin habarlanǵandaı, kóliktegi polıtsııa departamenti Almaty áýejaıynda qyzdy kepilge alǵan er adamdy ustaýǵa qatysqan qyzmetkerler boıynsha túsinik berdi.