Temirjoldy durys kesip ótpegender 9 aıǵa kólik júrgizý quqyǵynan aıyrylýy múmkin

ASTANA. KAZINFORM — Temirjoldy kesip ótý erejesin buzǵandar 9 aıǵa kólik júrgizý quqyǵynan aıyrylýy múmkin. Ákimshilik kodekske osyndaı ózgeris engizý usynylyp otyr.

Bul týraly Májilis depýtaty Únzıla Shapaq zań jobasynyń birinshi oqylymynda aıtty. 

«Zań jobasynyń aıasynda temirjol ótpelerinen ótý qaǵıdalaryn buzǵany úshin qoldanylatyn jazany qatańdatýdy kózdeıtin ózgerister kózdeledi. Keıingi jyldarda temir jolda osyndaı 58 jol-kólik oqıǵasy tirkelgen. Oyyń kóbi aýyr zardaptarǵa, adam ólimine ákeledi. Sonymen qatar mal jaıý, baǵý barysynda temirjol ótkeli arqyly aıdaý kezinde jol-kólik oqıǵalary bolyp jatady. Osyndaı oqıǵalardyń kóbeıgenine baılanysty kodekste aıyppul mólsheri kóterildi. Sondaı-aq, jol-kólik oqıǵasy saldarynan kólik quraldary nemese jol qurylystary búlinse, toǵyz aı merzimge kólik júrgizý quqyǵynan aıyrý qarastyrylady», — dedi Únzıla Shapaq.