Temirjoldaǵy apat: Keshikken jolaýshylar Atyraýǵa avtobýspen tasymaldanyp jatyr

ATYRAÝ. KAZINFORM – Atyraý qalasynyń mańyndaǵy Teńdik stansasyndaǵy temirjol apatynyń saldaryn joıý, jolaýshylar jáne júk tasymalyn qalpyna keltirý jalǵasyp jatyr. 

«Qazaqstan temir joly» UK» AQ-nyń baspasóz qyzmetiniń málimetinshe, temirjoldaǵy apattyń saldaryn joıý úshin 2 qalpyna keltirý poıyzy men 6 avtokólik jumyldyrylǵan.

– Qalpyna keltirý jumystaryna baılanysty «Mańǵyshlaq-Atyraý» jáne «Aqtóbe-Atyraý» jolaýshylar poıyzy keshigip kelmek. Apat saldaryn joıý jumystary áli de jalǵasyp jatyr, - dep habarlady kompanııanyń baspasóz qyzmeti.

Al, Atyraý oblysynyń ákiminiń baspasóz hatshysy Rýslan Jumaǵazıevtiń aıtýynsha, jolda turyp qalǵan jolaýshylar poıyzynyń jolaýshylaryn Atyraý qalasyna avtobýspen tasymaldaýǵa sheshim qabyldanǵan. 

– Maqat aýdanyndaǵy Qarabatan stansasynda turǵan «Mańǵyshlaq-Atyraý» jolaýshylar poıyzynyń jolaýshylaryn Atyraý qalasyndaǵy temirjol vokzalyna deıin avtobýspen tasymaldaý qolǵa alyndy. Bul úshin Atyraý qalasy men oǵan taıaý ornalasqan eldi mekendergi jolaýshylar tasymaldaıtyn kompanııalar 10 avtobýs jiberildi. Avtobýstardy «Aqjaıyq-Avtopark» jáne «Atyraý-Avtopark» JShS bóldi, - dep habarlady Rýslan Jumaǵazıev. 

Eske sala ketelik, buǵan deıin Atyraý oblysynda lokomotıv pen 11 vagon relsten shyǵyp ketip, jumysshylar zardap shekkenin jazǵan edik. 

Keıin poıyz júk kóligimen soqtyǵysqan orynǵa 12 qutqarýshy kelgenin habarlaǵan bolatynbyz.