Temirjolda júk tasymaldaý tarıfteri qaıta qarala ma

ASTANA. KAZINFORM – Temirjol kóligimen júk tasymaldaý tarıfterin qaıta qarastyrý josparlanǵan ba? Bul suraqqa Kólik mınıstrligi jaýap berdi.

- 2022 jylǵy 5 shildedegi jańa geosaıası jaǵdaılarda Qazaqstannyń kólik-tranzıt áleýetin damytý máseleleri týraly keńestiń qorytyndysy boıynsha Memleket basshysy QTJ boryshtyq júktemesin tómendetý, onyń ishinde tarıftik saıasatty jetildirý jolymen sharalar ázirleýdi tapsyrdy. Sonymen birge, Qazaqstan Prezıdentiniń 2024 jylǵy 25 qyrkúıektegi № 658 Jarlyǵymen bekitilgen Memleket basshysynyń 2024 jylǵy 2 qyrkúıektegi «Ádil Qazaqstan: Zań jáne tártip, ekonomıkalyq ósý, qoǵamdyq optımızm» atty Joldaýyn iske asyrý jónindegi Jalpyulttyq is-sharalar josparynyń 31-tarmaǵynda temirjol kóliginiń retteletin tarıf qyzmetterin 2024 -2026 jyldar aralyǵynda 24% ósirý tapsyrylǵan. Joǵaryda kórsetilgen tapsyrmanyń aıasynda 2024 jyly retteletin tarıfter 24 paıyzǵa kóterildi. Aldaǵy ýaqytta, ıaǵnı bıyl jáne 2026 jyly osy baǵytta jumystar jalǵasady, - delingen mınıstrliktiń Kazinform agenttigine bergen jaýabynda.

Eske salsaq, 2024 jyldyń basynda Kólik mınıstri Marat Qarabaev elimizde tasymaldanatyn júkterdiń basym bóligi ózin ózi aqtamaıtynyn málim etti.

Sondyqtan temirjol kóligimen júk tasymaldaý tarıfi saralanatyny aıtyldy.

Budan buryn habarlanǵandaı, temirjolmen júk tasymalyn arttyrý baǵytynda 4 iri joba jasalyp jatyr.