Temirjolda tranzıttik júk kólemi 100 mln tonnaǵa deıin jetedi

ASTANA. KAZINFORM – Tórt jylda operatorlar 7 myńnan astam júk vagonyn satyp alady. Bul týraly Kólik mınıstri Nurlan Saýranbaev málim etti.

— Qazaqstanda 300-den astam operator jumys istep otyr. Olardyń qolynda 142 myń júk vagony bar. Bul qazirgi júk tasymalynyń qajettiligin tolyq qamtıdy. «Qazaqstan temir joly» úlesi — 41 paıyz jáne bul vagondar áleýmettik mańyzy bar baǵyttarda jumys isteıdi. 2029 jylǵa deıin operatorlar tarapynan 7 myńnan astam jańa vagon satyp alynady. Bul júk tasymalynyń ósip kele jatqan áleýetin saqtap, damytýǵa múmkindik beredi, — dedi N. Saýranbaev Úkimet otyrysynda.

Mınıstr Qazaqstan halyqaralyq saýda baǵyttarynda ornalasqanyn aıta kele, elimiz arqyly 5 halyqaralyq temirjol dálizi jumys istep turǵanyn eske saldy.

— Qazaqstan qazir halyqaralyq tranzıttik hab retindegi mártebesin naqty bekitti. Sońǵy 10 jylda tranzıt kólemi eki esege ósip, 2024 jyly 27,4 mln tonnaǵa jetti. Temirjol salasynda atqarylyp jatqan jumystardy eskere otyryp, bıyl tranzıt kólemi 33 mln tonnaǵa jetedi. Al kelesi jyly 54 mıllıonnan asýy kerek. 2029 jyldyń sońyna deıin tranzıttik tasymal kólemin  67 mln tonnaǵa deıin jetkizý josparlanýda. Halyqaralyq sarapshylardyń (KPMG jáne PwC) boljamy boıynsha 2035 jylǵa qaraı tranzıttik júk kólemi 100 mln tonnaǵa deıin jetedi (4,4 trln teńgeni quraıdy). Aldaǵy ýaqytta bizdiń maqsatymyz — bul kórsetkishke erterek qol jetkizý. Elimizdiń tranzıttik áleýetinkóterý jáne tarıftik turaqtylyǵyn qamtamasyz etý úshin josparly jumystar ótkizilip jatyr, — dedi vedomstvo basshysy.

Onyń sózine qaraǵanda, qazir 7 termınal jumys istep jatyr.

Olar: Lıanıýngan, Sıan, Dostyq, Qorǵas, Quryq, Aqtaý jáne Almaty. Jaqynda 2 termınal ashylady: Selıatıno jáne Svısloch. Bolashaqta taǵy da 5 termınaldy damytý boıynsha jumys atqarylyp jatyr. Osylaısha, «Shyǵys — Batys» baǵytynda qazaqstandyq termınaldar jelisi qurylady.

Buǵan deıin jańa temirjol jelileriniń qurylysyna 12,8 myńnan astam adam tartylǵanyn jazǵan edik.