Temirjol jáne sý kóligi komıtetiniń tóraǵalyǵyna jańa basshy keldi

ASTANA. KAZINFORM – Nurjan Kelbýǵanov Temirjol jáne sý kóligi komıtetiniń tóraǵalyǵyna taǵaıyndaldy. Bul týraly Úkimettiń baspasóz qyzmeti habarlady. 

– Qazaqstan Respýblıkasy kólik mınıstriniń buıryǵymen Nurjan Amangeldiuly Kelbýǵanov Temirjol jáne sý kóligi komıtetiniń tóraǵasy bolyp taǵaıyndaldy, - delingen habarlamada. 

Nurjan Kelbýǵanov 1972 jyly Shyǵys Qazaqstan oblysynda dúnıege kelgen. Ol Almaty temirjol kóligi ınjenerleri ınstıtýtyn jáne M. O. Áýezov atyndaǵy Semeı ýnıversıtetin bitirgen.

Eńbek jolyn «QTJ «UK» AQ – «Almaty jol bólimshesi» fılıalynyń parki boıynsha kezekshi bolyp bastady. Ár jyldary tasymaldaý qujattaryn óńdeý jónindegi operator, stantsııa boıynsha kezekshi, ortalyqtandyrý beketiniń aǵa operatory, jol dıspetcheri jáne birqatar stantsııanyń bastyǵy bolyp jumys istedi.

Sondaı-aq «QTJ «UK» AQ – «Aqmola jol bólimshesi» fılıaly dırektorynyń jedel jumys jónindegi birinshi orynbasary, «QTJ «UK» AQ – «Shyǵys Qazaqstan jol bólimshesi» fılıalynyń dırektory, «QTJ-Júk tasymaly» AQ departamentiniń dırektory, «QTJ-Júk tasymaly» JShS bas dırektorynyń marketıng jáne josparlaý boıynsha orynbasary boldy.

Eske sala keteıik, buǵan deıin Birjan Kaneshevtiń «QazjolǴZI» AQ prezıdenti bolǵanyn habarlaǵan edik.